MIKIRIG dayon nawad-an og panimuot dayon namatay ang usa ka signage installer nga giatake tungod sa tumang kainit sa panahon, alas 2:45 sa hapon, Domingo, Abril 28 sa probinsiya sa Cotabato.
Ang biktima giila nga si alyas Rik-rik, 41 anyos, minyo ug taga Barangay Kimagango Midsayap Cotabato.
Matud ni Midsayap Chief of Police Lieutenant Colonel Realan Mamon nga samtang nagtaud og signage ang biktima sulod sa Megamarket sa lungsod sa Midsayap, kalit kini nga mikirig dayon nawad-an og panimuot.
Dali nga miresponde mga sakop sa Rescue Unit sa LGU-Midsayap ug gidala ang biktima sa balay tambalanan.
Gideklara sa mga doktor si Rik-rik nga dead on arrival huma gi-atake sa highblood tungod sa kainit sa panahon.
Nagpasidaan ang LGU-Midsayap sa katawhan nga mag-amping, i-hydrate ang kaugalingon aron likay sa di maayong epekto sa kainit sa panahon. (Edgardo E. Fuerzas)