Simpatiya sa vlogger nibanaw

BISAN og naa sa sulod sa prisohan ang usa sa mga nailhang content creator sa mga "Gen Z" sa Davao City nga si alyas "Brader" mibaha gihapon ang simpatiya sa netizens labi na sa mga followers niini ngadto sa vlogger.

Niadtong Biyernes sa gabii, Agosto 16, 2024, nasignit ang nahisgutang vlogger sa mga sakop sa Philippine Drug Enforcement Agency (PDEA) Davao Region ug sa SouthEastern Mindanao Regional Office (SEMRO) sa National Bureau of Investigation (NBI) sa usa ka bar sa Maa, Davao City.

Sumala sa mga netizens lahi ang interpretasyon ni "Brader" alang sa iyang kawsa nga "bless and love" ug ang paagi niini sa "meditation" gumikan mahisgutan na niini diin man sa verbal apan sa pagpakita sa aksiyon labot sa ilegal nga druga nga marijuana.

Tungod niini, nakuha ang atensiyon sa awtoridad ug gilayong mihimo og lehitemo nga buy-bust operation sa nahisgutang bar nga nahisakop sa Barangay Maa diin ang nahisgutan mihimo og gamay nga negusyo, sama sa t-shirt nga dunay printa ug giingong dunay mga vape.

Gibutyag ni NBI Director Atty. Archie Albao nga giingong "marijuana oil" ang sulod sa vape.

“Marijuana Oil, ang sulod sa mga vape nga iyang gidala,” saysay ni Atty. Albao.

Dihang nagpositibo nga giingong mobaligya ang dinakpan ngadto sa nagtakuban nga awtoridad, daling giposasan ang nasampit nga vlogger.

Nakuha sa posisyon sa dinakpan ang usa ka pakite sa gituohang pinaugang dahon sa marijuana, naa sa'y usa ka bottle 30ml nga suspected marijuana oil nga mao ang buy-bust item.

Nakuha sab ang usa ka cartridge sa 2ml suspected marijuana oil nga mao sab ang buy-bust item ug laing 38 pcs self sealing sachets of dried leaves nga marijuana motimbang sa 35 gramos dunay kantidad nga P4,375.

Dugang sa mga nakumpiska mao ang 1 clingwrap dried leaves sa marijuana motimbang sa 30 grams nga mokantidad og P3,750, ug usa ka bottle sa marijuana oil 30ml mokantidad og P1,500.

Lakip sa nakuha sa kapulisan ang 15 bottle dunay label nga “love and respect” nga naay marijuana oil, 3 unit sa mobile phone, usa ka sling bag, ug ang P1,000 nga buy-bust money.

Sa report sa usa ka news portal sa social media, gisaysay sa igsuon sa suspek sa post sa Facebook nga duna siya’y pagduda sa panghitabo.

Apan sumala ni Atty. Albao nga gibaligya ang "Marijuana Oil” nga gisulod sa vape og tag P200 hangtud P500.

“Tambal man ang marijuana, dapat himuon kining legal diri sa Pilipinas,” ingon sa usa ka Gen Z nga si Lloyd, 18-anyos, kinsa avid fan sa dinakpan.

Supak sab ang usa ka drayber sa traysikad sa hisgutanang makatambal ang marijuana, gumikan maabuso kini.

“Tambal lagi pero maabuso man sa paggamit nga mao na ang tulay sa posibleng daghan nga krimen, dili gyud ni himuong legal,” ingon ni Leonardo Empis, 45-anyos, taga Barangay 25-C, Poblacion, Davao City.

Ang nahisgutang vlogger kasamtangan nga naa gihapon sud sa prisohan ug gihikay ang kasong pagsupak sa Republic Act 9165 kun Comprehensive Dangerous Drug Act of 2002 batok kaniya sa korte. (Jeepy P. Compio)