'Sinako' nga mga shabu nasakmit

'Sinako' nga mga shabu nasakmit
Hulagway gikan sa Davao City Police Office

DAKONG kalampusan alang sa Davao City Police Office (DCPO) sa ilang malampuson nga pagdakop sa gikonsiderang usa ka high value individual nga nakuhaan og mokantidad sa minilyon ka pesos nga gituohang shabu atol sa ilang gikasa nga buy-bust operation ala 1 sa kaadlawon, Mayo 3, 2024 sa Purok 2, Camus Street, Barangay 9-A, Poblacion, Davao City.

Sa report gikan sa DCPO, usa ka alyas Dodong ang ilang target, 35-anyos, ug residente sa nasampit nga dapit.

Ang suspek positibo nga mobaligya og shabu sa nagtakuban nga kapulisan, hinungdan nga gikasa ang operasyon.

Gilayong giposasan ang suspek human niini gitunol ang mga sinako nga pakite sa gituohang shabu nga dunay market value nga Php 5,489.844.00 bugti sa marked money.

Sumala sa San Pedro Police Station dugay na nilang gipanid-an ang lihok sa suspek hangtud nga nakigtransaksiyon na kini sa mga pulis nga mobaligya og shabu.

Ang terminolohiya nga "sinako" nga shabu maoy gigamit sa pagtataw sa gidaghanon sa ilegal nga druga nga nakompiska sa mga awtoridad.

Kasong pagsupak sa Republic Act 9165 kun Comprehensive Dangerous Drugs Act of 2002 ang gipasaka nga kaso batok sa suspek didto sa korte.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph