APROBADO na sa ika-20 nga Konseho sa Davao City sa ikatulo ug katapusang pagbasa sa Sangguniang Panlungsod Martes, Mayo 20, 2025, ang pag-amenda sa City Ordinance No. 0954-22, nga magdoble sa tinuig nga subsidiya alang sa kuwalipikado nga senior citizens gikan P1,500 ngadto sa P3,000.
Ang pag-amenda, gisugyot ni Konsehala Pilar Braga, tsirman sa Committee on Education, Science and Technology, Arts and Culture, gitumong sa paghupay sa kapit-os sa pinansiyal sa mga senior citizens, ilabi na sa medikal ug galastuhan nga dunay kalambigitan sa panglawas.
Gipagawas ang committee report ngadto sa mga tigbalita, kon diin si City Social Welfare and Development Office (CSWDO) head Julie Dayaday nagrekomenda sa pagtaas sa tinuig nga pinansiyal nga tabang ngadto sa mga senior citizens tungod sa pagtaas sab sa galastuhan sa gimentinar nga mga tambal ug uban pang panginahanglan nga dunay kabahin sa ilang panglawas.
Dugang sa pagtaas sa subsidiya, gidasig sab sa ordinansa ang mga senior citizens nga
magpa-miyembro sa mga giilang organisasyon, asosasyon, o tsapter sa mga senior citizens sa ilang tagsa-tagsa ka mga barangay. Kini makatabang aron nga maseguro nga pabilin silang napahibalo bahin sa mga balaod, programa, ug kalihukan nga gitumong kanila.
Kadtong mga seniors nga nagkasakit ug di na makahimo sa paglakaw, kinahanglan nga mohatag og awtoridad sa usa ka representante pinaagi sa sertipikasyon sa ilang kondisyon gikan sa CSWDO social worker nga gi-asayn sa ilang barangay una ang gitakda nga payout sa tinuig nga subsidiya.
Mga kuwalipikado nga benepisyaryo mao ang mga senior citizens nag-edad og 60 ug pataas kinsa nagkupot og orihinal nga Senior Citizens ID nga giisyu sa Office of Senior Citizens Affairs (OSCA).
Ang "cut-off date": alang sa master list sa senior citizens nga elidyibol alang sa subsidiya sa katapusang "working day" sa Mayo matag tuig. Mga senior citizens kinsa mag-edad og 60 sa Hunyo ug Disyembre malakip sa listahan alang sa mosunod nga calendar year.
Sa datus nga gihatag sa CSWDO ngadto sa mga tigbalita, sukad 2024, duna na'y mga 168,799 ka rehistradong senior citizens; apan, apan ila pang gihiusa ang ilang datus uban ang OSCA
Samtang ang wala makuha nga tabang pinansiyal lima ka adlaw human nga payout, i-
liquidate ug ibalik ngadto sa City Treasurer’s Office, ug unya sa City Government of Davao. Ang badyet alang sa tinuig nga subsidiya i-usa ngadto sa tinuig nga badyet sa siyudad, nga ipailawom gihapon sa naandan nga "auditing and accounting rules and procedures".
Sa paghinabi uban ni Braga niadtong Mayo 6, 2025, gilauman niini nga ang hingpit nga pag-implementar sa ordinansa mahitabo sa Hunyo, human sa pag-aproba ni Davao City Mayor Sebastian “Baste” Duterte.
“We feel that P1,500 is too small, especially this is our senior citizen ayuda para sa kanilang mga gamot [financial aid for their medicines], medical needs,” tin-aw niya.
Ang pag-amendar nag-usab sab sa "payout schedule" gikan sa Nobyembre ngadto sa bag-ong gitakda nga Hulyo ug Oktubre, aron mosubay sa Elderly Filipino Week sa Oktubre. (Rojean Grace G. Patumbon, uban sa taho ni Germa R. Siazon, University of Mindanao Intern)