Sunog nga nikalas og 2, nidanyos P2.2M

SANGLIT mga persons with disability (PWD), wala dayon nakagawas sa ilang panimalay ug nangalisang na sab ang ilang mga kabanay sa pag-ulbo sa kalayo alas 8:25 sa gabii, Sabado, Hulyo 13, 2024, sa Purok 2, Magallanes, Brgy 2-A, Poblacion, Davao City.

Subay sa inisyal nga datus sa City Social Services and Development Office (CSWDO) adunay 203 ka mga apektadong pamilya nga naglangkob sa 545 ka mga indibiduwal sukad sa pagtala alas 12:47 sa tungang gabii kagahapon, Hulyo 14, 2024.

Ang 203 ka pamilya maoy naglangkob sa 72 ka mga owners, 70 ka mga renters, 13 ka sharers, 42 mga boarders, usa ang caretaker.

Sa hitabo, gitaho nga lima ang naangol samtang duha ka mag-agaw nga mga PWDs namatay.

Sa incident report sa Davao City Police Office (DCPO), nasayran nga nagsugod ang pag-ulbo sa kalayo sa panimalay sa usa ka Charlene Puerto Lopez, bar entertainer.

Sanglit ang mga panimalay sa dapit gama sa mga light materials, daling mikanit ang kalayo sa kabalayan.

Niabot sab dayon ang kabomberohan gikan sa Bureau of Fire Protection (BFP), Central 911 Fire Auxiliaries ug ubang mga fire volunteers.

Sumala ni Fire Officer (FO) 1 Eunelle Jun U Mabale, Fire Investigator sa C.B. Bangoy Sr. Fire Station nga padayon pa nilang gisubay ang hinungdan sa kalayo diin na-fire under control mga alas 11 na sa gabii.

Gibana-bana nga anaa sa mokabat sa kapin kun kulang P2,250,000 ang danyos sa sunog.

Sa ulahing progress report sa DCPO, gipang-ila ang mga biktima nga sila Rjay Lopez, 11-anyos, anak ni Charlene Puerto Lopez ug ang ig-agaw niini nga si Roy Reteza, 14-anyos, anak ni Diana Puerto Lopez.

Ala 1:05 na sa kaadlawon kagahapon, Hulyo 14, 2024, gideklara nga fire out ang sunog diin ang duha ka bata napalgan sud sa ilang comfort room sa balay.

Gidala sab dayon ang duha ka patay nga lawas sa mga biktima ngadto sa Villa Funeral sa Toril, Davao City.

Gikanayon sa Barangay Social Welfare and Development Office nga ang mga nasunogan naa gitiner sa Magallanes Elementary School diin ang CSWDO miatiman na sa pangunang panginahanglan sa mga biktima.

Giasikaso na sab sa CSWDO ang pagdawat og hinabang pinansiyal sa mga biktima sa sunog. (Jeepy P. Compio)