GITAHO sa Talomo Fire Station nga ang danyos sa sunog sa Golden Fabrication Plant sa Bangkal Diversion, Davao City gibanabana nga naa sa P200,000.
Kini maoy gikompirma ni FO1 Mitchell Anton N. Calibo, fire investigator sa Talomo Fire Station. Wala hinuoy gitaho nga mga naangol o namatay sa dihang nahitabo ang sunog.
Gibutyag niya nga ang kalayo nagsugod bandang 1:26 sa hapon ug nadeklara nga pawong na sa 1:47 sa hapon.
Matud ni Calibo nga basi sa ilang inisyal nga imbestigasyon, ang posible nga hinungdan sa sunog mao ang paggamit og acetylene aron sa pagputol og bakal ug beams, kon diin naduslitan ang mga duol nga pintura ug uban pang daling mosiga nga materyales.
“So far sa initial nga pag-imbetsiga naay naga-acetylene, nagaputol og bakal mga beams, mga dagko unya naa sa iyang gilid naay nag-file mga pintura, mga thinner, naay uban didtoa open, unya once nagakuan ka og bakal mag-spark man na,” saysay niya sa paghinabi sa DXDC 621 RMN Davao.
Apan gikanayon niini nga ang insidente sa sunog gipailawom pa sa imbestigasyon.
Kahinumdoman nga ang Bureau of Fire Protection - Davao City Division (BFP-Davao City) nagtaho og 6.3 porsiyento nga pagtaas sa insidente sa sunog gikan sa Enero hangtud Pebrero 2025 itandi sa samang panahon sa niaging tuig.
Si Senior Inspector Frances Marie Sendrijas, tigpamaba sa Davao City Fire District, nagbutyag nga 111 ka mga insidente sa sunog natala niadtong sayo sa 2025, gikan 104 sa 2024.
Ang nag-unang hinungdan mao ang electrical ignition tungod sa loose connections (21 ka kaso), gisundan sa uban pang mga hinungdan sama sa open flames sa rubbish fires o bonfires.
Ang BFP-Davao dunay 450 ka personahe, 16 serviceable fire trucks, lima gipailawom sa maintenance, uban ang laing upat ka mga trucks nga gilauman karong tuiga. (Rojean Grace G. Patumbon)