Supervisor sa kompaniya sa bus gipatay

ATRASO ang gilantaw sa mga awtoridad nga motibo sa pagpusil-patay sa supervisor sa Mindanao Star Bus alas 7:05 sa buntag, Lunes, Agosto 5, 2024, sa Kidapawan City.

Giila ang biktima nga si Reynaldo Uyangguren, 49-anyos, minyo, ug nagpuyo sa Davao City.

Gibutyag ni Kidapawan City Chief of Police, Lieutenant Colonel Dominador Palgan Jr., nga naghulat og bus ang biktima kilid sa national highway sa Barangay Patadon, Kidapawan City atbang sa buhatan sa Department of Agriculture (DA) niadtong higayona. Apan kalit lang matud pa giduol og duha ka wala mailhing lalaki ug dayong pusil kaniya ug dayong sibat sakay og motorsiklo paingon sa Matalam, Cotabato Province.

Patay gilayon si Uyangguren human nga maigo sa ulo ug nawong.

Apan nagtuo ang pamilya sa biktima nga posibleng dunay kalambigitan sa trabaho ang pagpusil sa biktima.

Hinuon, kapulisan sa Kidapawan City Police Station padayon pa nga nihimo og makuting imbestigasyon aron nga matumbok gyud ang tinuod nga motibo sa maong krimen. (EEF)