NAGKATIGUM ang mga suporter ni Bise Presidente Sara Duterte sa Roxas Freedom Park alang sa dinungan nga indignation rally ug candle-lighting ceremony niadtong Dominggo, Pebrero 9, 2025.
Nagbitbit og mga banderita ug nagsul-ob og kamisolin nga dunay marka nga mga mensahe #protectvpsara ug #notoimpeachment, mga suporter ni Duterte naglusad og candle-lighting ceremony, samtang mga kaigsuonang Muslim naghalad og pag-ampo ngadto sa Bise Presidente.
Gisulti ni Randy Usman, kanhi deputy mayor sa tribung Maranao ug usa sa mga nagpasiugda, ngadto sa mga tigbalita atol sa paghinabi nga mga suporter gilangkuban sa mga Kristiyano, miyembro sa Indigenous Peoples (IP), ug Muslims.
Matud niya nga buot nilang ipasibaw ang ilang kabalaka sa impeachment ni Duterte.
“Yung complaint nila ay walang bearing na yung kinaso nila kay VP Inday na which walang bearing hindi niya pwede sagutin, walang katutuhan yung ginawa ng quad com,” matud niya.
Dugang ni Usman nga ang gamay nga "turnout " sa mga suporter tungod kay mga nag-unang lideres lang ang nisalmot sa kalihukan.
Gitin-aw niya nga daghang mga suporter gikan sa Davao Region nagpadayag sa ilang suporta, kon diin uban kanila gikan pa sa Surigao.
Bahin sa confidential fund, sulti ni Usman nga ang House of Representatives di ilakip sa pag-imbestigar sa confidential fund; inay, kinahanglan nga responsabilidad kini sa Commission on Audit (COA). Iyang gipaklaro nga ang confidential fund ni President Ferdinand “Bongbong” Marcos Jr. wala giimbestigahan.
Gibutyag ni Usman nga kapin 220 ka kongresista kinsa nilagda sa impeachment complaint batok ni Duterte way madawat nga boto gikan sa iyang suporter.
Kung patas silang mga magbabalaod, tanang mga politiko kinsa dunay confidential funds kinahanglan nga imbestigaran.
Gikanayon sab ni Monday Mar Ruaza Ayso, 22-anyos nga trabahante gikan sa Surigao del Sur nga iyang nakita ang indignation rally sa Facebook ug buot nga mopadayag sa iyang suporta ngadto kang Duterte.
“Hindi ako nagdalawang-isip na pumunta kasi I am one of the 32 million people who voted Sara and now I am here protecting VP Sara,” pagbutyag niya.
Ang rali nitapos uban ang daghang mga pagpamulong gikan sa mga suporter, ang pagsindi sa mga kandila, ug ang pagkanta sa Bayan Ko sa mga nitambong.
Nibahad si Usman nga di sila mohunong sa pagpasibaw sa ilang mga "concerns" hangtud nga ang impeachment complaint kontra Duterte isibog.
Sulti sab niya nga gihuwat sab nila ang kaso kon diin gipangayoan sa Supreme Court (SC) og komento ang ehekutibo ug lehislatibo sa gobyerno bahin sa petisyon nga naghagit sa "constitutionality" sa General Appropriations Act (GAA).
Kahinumdoman nga uapt ka mga impeachment complaints ang giduso batok kang Duterte.
Apan sa usa ka press conference, wala hatagi og dakong pagtagad sa Vice President ang reklamo, ug nagsulti pa nga ang panagbuwag sa manag-uyab mas guol pa itandi sa impeachment nga gipasaka batok kaniya.
Tug-an ni Duterte nga ang iyang legal team nagsugod na og pangandam alang sa impeachment complaint batok kaniya sukad pa niadtong Nobyembre 2023, sa dihang si ACT Teachers party-list Representative France Castro unang nagpasibaw sa maong isyu. (Rojean Grace G. Patumbon)