WALAY girekomenda nga piyansa ug hayan sa prisohan matiguwang ang 41-anyos nga lalaki kinsa dunay duha ka ihap nga kasong lugos.
Giila sa Baguio Police Station ang suspek nga si alyas Greg, minyo, construction worker, ug residente sa Purok African Daisy, Baguio District, Davao City.
Ang suspek nadakpan sa Baguio police subay sa gahum sa warrant of arrest sa kasong Qualified Statutory Rape ubos sa Article 266-A (1) in Relation sa Art 266-B (1) sa Republic Act (RA) 8353 (2 counts) dunay criminal case Nos. R-DVO-24-01906 hangtud 01907-CR.
Gipagula ang warrant of arrest ni Judge Zarah Daquila Aguisando-Silvosa, acting Presiding Judge sa Regional Trial Court, Eleventh Judicial Region, Branch 33, sa Davao City, pinetsahan Abril 24, 2024.
Nadakpan ang suspek sa Purok African Daisy, Brgy Baguio Proper, Baguio District, Davao City kinsa temporaryo karong gibalhog sa selda sa Baguio PNP ug naghulat sa sunod nga mando sa korte labot sa iyang kaso. (Jeepy P. Compio)