BALHOG na sa selda sa kapulisan ang most wanted person, kinsa suspek sa pagpabusikad og bomba, alas 3:00 sa hapon, Martes, Abril 29, 2025, sa General Salipada K. Pendatun, Maguindanao del Sur.
Giila ang suspek nga si Tasludin Kuda Saligan alyas Tasly kinsa nagpuyo sa Barangay Midpandacan, General Salipada K. Pendatun.
Sumala kang Maguindanao del Sur Police Provincial Director, Police Colonel Ryan Bobby Paloma nga gidakop sa hiniusang puwersa sa MDSPPO, Criminal Investigation and Detection Group Regional Field Unit – Bangsamoro Autonomous Region (CIDG-RFU BAR), Regional Special Operations Team (RSOT), 2nd Provincial Mobile Force Company si Saligan sa public market sa Brgy. Badak, General Salipada K Pendatun.
Ang suspek dunay mga warrant of arrest sa kasong murder nga gi-isyu sa Regional Trial Court, Branch 15, Shariff Aguak MDS; kasong murder ug multiple frustrated murder sa RTC, Branch 23, Kidapawan City, nga pulos walay girekomenda nga piyansa.
Si alyas Tasly maoy usa sa mga suspek sa Yellow Bus Line bombing incident sa Tulunan, North Cotabato niadtong Enero 27, 2021 diin usa ka tawo ang namatay samtang lain pang tulo ang naangol. (Edgar E. Fuerzas)