WALA pa matumbok sa Buhangin Police Station (DCPO-PS5) ubos sa padumala sa Davao City Police Office (DCPO) ang nahimutang sa nag-inusarang suspek nga nagpatay sa duha ka senior citizens, duha ka adlaw human nahitabo ang insidente niadtong Sabado sa gabii, Marso 9, 2024.
Samtang gilusad na ang hot pursuit operations batok sa suspek nga ginganlan og Ludovico Ibañez, 59, samtang gihimo kini nga balita.
Base sa spot report nga gihatag sa mga awtoridad, mga biktima nailhan nga si Gaudiosa Reutotar, babaye, 75, ug Romeo Lumoha, lalaki, 67, pulos molupyo sa Purok 39, Deitic Compound, Forestal, Barangay Cabantian.
Gibutyag sa inisyal nga imbestigasyon nga ang suspek kinsa molupyo sab sa samang lugar dunay nay kaagi sa wala pagsinabtanay sa mga biktima, kabahin sa luna ug propedad sa agrikultura, nga maoy nakaingon sa insidente.
Nasayran sab nga si Ibañez nigamit og di awtorisado ug wala masayring kalibre sa pistola.
“Purely personal grudge siya kay kung makita nato ang biktima mga senior citizen na. Yano lang gyud ni sya na indibiduwal. Wala man pud nawala ang mga gamit. Sa amoang pag- imbestiga, naa pud silay lalis sa una based sa mga statements sa mga anak [sa victim] ug mga anaa didto nga mga residente,” butyag ni PS5 Police Station Commander, Police Major Joenel S. Pederio sa paghinabi sa telepono, Lunes, Marso 11. (David Ezra Francisquete)