COTABATO CITY -- Maghimas-himas na's selda sa prisuhan ang usa ka wanted human kini masikop alas 5:15 sa hapon, Miyerkules, Marso 20, 2024 didto sa Maguindanao Del Sur.
Suspek mao si Guiadem Manalasal, 43, minyo, taga Datu Paglas, Maguindanao Del Sur.
Sigun ni Criminal Investigation and Detection Group-Bangsamoro Autonomous Region (CIDG-BAR) Director Lieutenant Colonel Ariel Huesca nga may nagsumbong kanila nga ang suspek anaa sa public market sa Brgy Poblacion Datu Paglas Maguindanao Del Sur.
Si Manalasal may warrant of arrest sa kasong frustrated murder.
Daling milusad og operasyon ang CIDG-BAR, Maguindanao police ug Datu Paglas Municipal Police Station, ug nasikop ang suspek, diin nasakote sab ang kalibre .45 nga pistola nga may bala ug duha ka magasin kaniya.
Ang dinakpan anaa sa prisuhan sa CIDG-BAR samtang naghuwat sa sunod nga mando sa korte sa iyang kaso. (Edgar E. Fuerzas)