NANAWAGAN karon ang City Social Welfare Development Office (CSWDO) sa Davao nga kon dunay mo-donate og hinabang sa mga nasunogan sa Purok San Jose, Block 10, Barangay Buhangin idiretso kini kanila.
Sumala ni CSWDO District Head Jonalyn Pablo nga naa lamang sila sa dapit sa nasunogan diin padayong nagpahigayon og assessment sa mga biktima sa sunog.
“Naa lang ta diri sa area, diin sa kung kinsa kadtong mo-donate, i-diretso lang sa atong team naa lang diri sa site,” ingon ni Pablo kinsa padayong naghan-ay sa pagtunol sa mga nag-unang panginahanglan sa mga nasunogang pamilya.
Niya pa nga subay sa datus sa Bureau of Fire Protection (BFP) anaa sa P1.7 milyon ang danyos sa sunog diin wala natala nga namatay gawas lang sa mga manok pantari ug mga binuhing iro.
Anaa sa 14 ka mga balay ang totally damaged samtang usa ang partially damage, diin ang kalayo nagsugod gikan sa ikaduhang andana sa balay sa usa sa mga nasunogan nga si alyas Olive.
Sumala ni Olive nga namatikdan sa iyang mga anak nga nanimaho og aso sa dihang gisaka sa taas nga bahin nakit-an na lamang nga nagsiga na ang wire sa router sa wifi diin gisuwayan pa kini og palong pinaagi sa pagsablig sa tubig apan paspas nga mikanit ang kalayo hinungdan sa pagkasunog sa mga gambalay.
Gikanayon nga anaa sa 15 ka pamilya kun 52 ka mga indibiduwal ang apektado sa maong sunog.
Giproseso na ang pagdawat og hinabang pinansiyal sa mga nasunogan. (Jeepy P. Compio)