Tag-iya sa karenderya gitipi; kustomer pagan

SELOS sa negusyo ang gilantaw nga motibo sa mga awtoridad sa pagpusil patay sa tag-iya sa tindahan ug pagkapagan sa kustomer niini alas 4:00 sa kaadlawon, Agosto 10, 2024, sa Cotabato City.

Giila ang biktima nga si Bai Sla Sendad Kamid, 48-anyos, minyo samtang ang napagan nga kustomer mao si Guiamal Kahal, 55-anyos, nga managsamang namuyo Bagsakan Area Supermarket, Mother Barangay Poblacion, Cotabato City.

Gibutyag ni Cotabato City Police Office director Colonel Joel Estaris nga nangandam ang biktima sa iyang lutuon sa karenderya nga tindahan niini apan kalit lang giduol og duha ka wala mailhing tawo ug gipusil gamit ang kalibre .45 nga pistola.

Giingong ang saag nga bala niigo sab sa kustomer sa biktima nga si Kahal nga nangape sa karenderya niadtong higayona.

Abtik nga miikyas ang mga suspetsado sakay sa motorsiklo paingon sa hilit nga dapit sa siyudad samtang ang biktima namatay gilayon human makaangkon og samad sa nagkadaiyang bahin sa lawas.

Hinuon, padayon pa ang kapulisan sa CCPO sa ilang imbestigasyon aron nga matumbok ang mga suspek nga nagpatay sa babaye. (Edgar E. Fuerzas)