Taga-UM ika-10 sa 2025 PNLE

NAPAHIMUTANG sa ika-10 nga puwesto ang graduwado gikan sa University of Mindanao (UM) sa Mayo 2025 nga Philippine Nurses Licensure Examination (PNLE).

Si Marc Joshua Saranillo sa UM nakasulod sa ika-10 nga puwesto sa 2025 PNLE uban ang grado nga 88 porsiyento. Siya lang ang graduwado gikan sa Davao Region nga nakaluna sa eksaminasyon.

Nagpasalamat si Saranillo sa Ginoo sa iyang kalampusan, ug nagkanayon nga ang pagkahiluna sa ika-10 maoy sayong regalo sa iyang adlaw nga natawhan.

Matud niya nga ang tanan niyang paningkamot napuslan ug nagpadayag og dakong pasalamat alang suporta sa iyang pamilya, kahigalaan, ug minahal sa kinabuhi kinsa maoy nagpadasig kaniya.

Gipasalamatan sab niya ang UM ug iyang mga clinical instructors tungod sa pagpaambit sa ilang kahibalo ug kasinatian kaniya atol sa iyang pagtungha.

“This is a collective effort. I am just a vessel of knowledge, without them I am nothing. Thank you, everyone,” padayag pa niya sa Facebook post.

Dugang pa, ang College of Health Sciences Education nahiluna sa ikatulong puwesto sa mga top-performing schools uban ang 50 hangtud 99 ka examinees.

Ang kolehiyo dunay 98.53 porsiyento nga grado alang sa mga first-time takers, 64.39 porsiyento nga national passing rate, ug 98.55 porsiyento nga kinatibuk-ang passing rate.

“Congratulations to all the BS in Nursing students at the University of Mindanao for successfully passing the May 2025 Nurse Licensure Examination! UM achieved the top 3 ranking in the Philippines for institutions with at least 50 to 99 nursing licensure exam takers,” pahayag sa UM sa Facebook post niadtong Mayo 15, 2025.

Si Angelica Dator sa Southern Luzon State University–Lucban (SLPC) maoy una, gisundan ni Doris Ann Laygo sa Philippine Women’s University–Manila sa ikaduha, ug Arielle Sabrina Natividad sa SLPC sa ikatulo ug Jonna Erosa Villanueva sa Iloilo Doctors College sa ikaupat.

Upat ka mga indibiduwal nagtabla sa ikalimang puwesto, tulo sa ika-unom, walo sa ika-pito, upat sa ika-walo, siyam sa ika-siyam, ug siyam ka indibiduwal nahiluna sa ika-10.

Sumala sa Professional Regulation Commission (PRC), mga 10,770 ang nagkuha sa pasulit, apan 6,935 lang ang nakapasar. Ang eksaminasyon gidumala sa Board of Nursing, gihimo niadtong Mayo 5 ug 6, 2025, sa 18 ka test centers sa Pilipinas. (Rojean Grace G. Patumbon)