GIPANG-ILA na ang mga overweight ug obese nga pulis sa Davao City Police Office (DCPO), subay sa direktiba sa Philippine National Police Chief nga magpabiling physically fit ang tanang miyembro sa kapulisan.
Sumala ni DCPO spokesperson Police Captain Hazel Tuazon, dunay 50 ka mga personnel nga naka-assign sa pag-monitor sa timbang sa mga pulis, ilabi na sa mga giilang mga "chubby-chubby."
Tungod niini, gi-require karon ang partisipasyon sa mga aktibidad sama sa Zumba, basketball, ug uban pang ehersisyo nga ginahimo kausa o makaduha sa usa ka semana.
“Kabalo na sila, kung unsay resulta kung dili mag-diet. Kung gusto gyud ta makagukod og kriminal, dapat physically fit ta,” ingon ni Tuazon.
Ang lakang kabahin sa implementasyon sa Republic Act 8551 o ang Philippine National Police (PNP) Reform and Reorganization Act of 1998, nga nagmando nga ang mga miyembro sa PNP kinahanglan magpadayon sa ilang kuwalipikasyon, lakip na ang kahimsog sa lawas, samtang naa pa sa serbisyo.
Ilawom sa Section 30 sa maong balaod, ang "standards for physical fitness" giila isip sumbanan sa retention, promotion, ug disciplinary action.
Ang kapakyas sa pagtuman sa maong standards mahimong hinungdan sa pagka-disqualify sa promosyon o sa posible nga early retirement.
Ang monitoring, giingon sa opisyal, dili lang limitado sa DCPO apan kabahin sa mas halapad nga kampanya sa tibuok rehiyon nga gipasiugdahan sa liderato sa PNP. (Pat Cervantes, AdDU intern)