DAVAO DEL NORTE - Wa damha sa usa ka tanod nga sa iyang pagpangihi, makakita siya og armas sa Purok 1, Brgy. Dagohoy, Talaingod alas 4:45 sa hapon , Hulyo 21, 2024.
Nasayran nga si Dante Chavez, hamtong ang pangedaron, minyo, tanod sa Brgy. Dagohoy, Talaingod maoy nakakita sa nahisgutang armas nga usa ka .38 caliber revolver nga dunay tulo ka mga buhing bala.
Base sa inisyal nga imbestigasyon, si Chavez niadtong higayona padung nga mopauli sa ilang balay gikan nga nag-duty isip tanod sa barangay hall sa maong lugar.
Samtang nagbaktas, giingon nga nihunong kini aron nga mangihi. Sa wala damha nakita ang kolor blue nga sling bag nga nahabilin sa waiting shed sa maong dapit.
Sa dihang gisusi, maoy nakita ni Chavez ang .38 caliber revolver nga maoy sulod sa sling bag.
Gisurender ni Chavez ang maong armas, uban ang tulo ka mga buhing bala, ngadto sa Talaingod Municipal Police Station alang sa tukmang disposasyon. (Dexter T. Visitacion)