MIHATAG og katin-awan si Mae Taripe kalabot sa viral nga video nga mikatap sa social media niadtong Marso 16, 2025, nga nahitabo sa Purok Hinagdan, Napnapan, Davao de Oro.
Sa maong footage, makita ang kakusog sa hangin nga dala sa helicopter nga gisakyan ni Noe “Butchoy” Taojo sa iyang pagbisita sa maong lugar.
Human nga mipakalat ang video, nakadani kini og lain-laing reaksiyon sa katawhan, uban misaway, samtang ang uban mitan-aw niini isip usa ka dili tinuyoan nga insidente.
Gitubag ni Taripe ang mga hungihong nga may pipila kunong tawo nisakay sa maong isyu aron lamang dauton si Taojo.
Sa usa ka panaghinabi, iyang gipasabot nga walay kamatuoran nga may mga sin nga nanglupad o natagak gikan sa ilang atop.
“Wala pa mahuman ang among kusina. Nagpapanday pa mi, ug temporaryo ra gyud ang gibutang nga mga sin sa atop, wala pa kini malansang,” pasabot ni Taripe.
Dugang pa niya, “Samtang naglaba ko, nadungog nako ang kusog kaayong tingog. Mao na diay to ang helicopter ni sir Butchoy. Nalipay ko, kay first time nakong makakita niya. Nagkuha dayon ko'g cellphone para mag-video, pero medyo nahadlok sad ko tungod sa kakusog sa hangin.”
Gipasabot usab ni Taripe nga nasayop og sabot ang uban sa iyang giingon sa video. Sumala pa niya, ang iyang aktuwal nga giingon mao, “Day, hawa dira kay manglupad nang sin diha, basin maigo siya kay naa siya sa sulod sa CR.” Dili kini pagpangdaut kundili kabalaka lang sa kahimtang sa ilang silingan.
Tungod sa nahitabo, personal nga nangayo og pasaylo si Taojo kang Taripe ug sa uban nga naapektuhan sa hangin gikan sa iyang helicopter. Giklaro niya nga walay intensiyon nga dauton ang balay sa bisa'g kinsa; ang iyang tinguha mao ang paghatag og serbisyo ug kaayohan sa komunidad.
Isip pagtabang ug pasalamat sa pagsabot sa maong insidente, mihatag og cash assistance ang kampo ni Taojo kang Taripe aron mapadali ang konstruksiyon sa ilang panimalay.
Ang insidente nagpahinumdom sa tanan nga bisan pa sa teknolohiya ug intensiyon nga makatabang, importante gihapon ang pagtuki ug hustong pagsabot sa mga panghitabo—kay dili tanan nga makita nato sa video, mao na gyud ang tinuod nga istorya. (PR)