ANDAM nga mosang-at og petisyon si Atty. Aquino Sajili nga mohangyo nga mobuwag ang Tawi-Tawi sa Bangsamoro Autonomous Region in Muslim Mindanao (Barmm).
Si Sajili, kinsa tsirman sa Tawi-Tawi Chamber of Commerce, niingon nga mao kini ang iyang reaksiyon tungod sa dayag nga kakuwang sa bili sa Barmm sa mga taga Tawi-Tawi.
Kini tungod sa dili patas nga representasyon sa Tawi-Tawi sa BTA Parliament.
Ang duha ka Members Parliament gikan sa Tawi-Tawi, Amilbahar Mawalil ug Professor Eddie Ali, giingong wala matudlo og balik.
Gipulihan sila sa bugtong MP gikan sa Tawi-Tawi. Ang iyang pangutana, unsaon man pagkadungog sa tingog sa mga taga Tawi-Tawi kon usa ra sila ka representante sa parliament.
Dugang pa niya nga kadaghanan sa iyang nahinabi bahin niini nga isyu nasagmuyo, nasuko, ug naglagot.
Gidugang niya nga mora'g gibalewala sila tungod kay gawas sa kakuwang sa representasyon, hinay sab ang pagpatuman sa mga programa sa Barmm sa probinsiya sa Tawi-Tawi.
Giklaro niini nga ang gisaad nga mga programa ug serbisyo, sama sa pag-atiman sa ospital sa mga hilit nga dapit sa Tawi-Tawi, wala mahatag kanila.
Kahinumdoman nga unang mibuwag sa Barmm ang Jolo-Sulu. (Edgar E. Fuerzas)