NAA NA gyud sa hinapos nga trabaho ang dugay nang gipaabot nga Bucana Bridge Project human sa malampuson ang katapusang pagbubo og semento deck slab sa tulay, aron nga hingpit nang masumpay sa tibuok estraktura gikan sa Piers 1 hangtud 5, pagkompirma sa Department of Public Works and Highways (DPWH).
Ang seremonyal nga "concrete pouring" nahitabo niadtong Biyernes, Hulyo 18, 2025, ilabi na gyud sa parte tali sa Piers 2 ug 3. Kini nagtimaan sa koneksiyon sa estraktura ngadto sa tanang lima ka piyer nga nagpasabot sa pagkakompleto na sa "main superstructure" sa tulay.
Ang Bucana Bridge, usa ka flagship component sa China Aid Localized Project, kabahin sa pinadako nga Davao City Coastal Road Network. Ang inprastraktura gidesinyo aron nga mapaluag sa trapiko sa central business districts sa dakbayan ug magpalambo sa regional mobility pinaagi sa paghatag og alternatibo ug mas episiyente nga ruta sa tibuok Davao River.
Dunay gitas-on nga 480.20 metros, ang upat ka linya, "six-span extradosed bridge" nagporma sa sentro sa 1,340-meter project kung ilakip ang iyang approach roads. Kung mahuman na, magsumpay kini sa Barangays 76-A Bucana ug Matina Aplaya critical urban communities sa tabok nga bahin sa suba—nga dako nga kalamboan sa oras sa pagbiyahe sa mga molupyo ug motorista.
Gikanayon ni Senior Undersecretary Emil K. Sadain, kinsa nangulo sa flagship infrastructure projects sa DPWH, nga ang pagkonstrak sa tulay nagpabilin nga nakatakda nga gitarget nga matapos sa Oktubre 2025.
Una sa katapusang "deck pour", tanang "stay cables" alang sa piyers sa tulay hingpit nang na-instolar niadtong Hunyo 26. Ang mga mosunod nga bulan magtutok na lang sa nahabiling trabahuon sama sa pagpa-uga sa semento, pinising sa ibabaw sa kalsada, pag-instolar sa suga sa dalan, pedestrian railings, ug uban pang mga trabahuon.
Kung magamit na, gilauman nga ang Bucana Bridge dako kaayo og pulos sa pagpakubos sa paghuot sa mga sakyanan sa mga "existing downtown bridges" pinaagi sa paghanyag og direkta ug modernong ruta alang sa mga pribado ug pampubliko nga sakyanan.
Gilantaw nga ang Bucana Bridge makaserbisyo sa liboan ka mga sumasakay matag adlaw ug gilauman nga mamahimong usa sa mga nag-unang transport arteries sa urban network sa Davao City.
Ang pagtapos niini nahisubay sa mas halapad nga panglantaw sa gobyerno sa pagpalig-on sa inprastraktura aron pagsuporta sa "inclusive" nga paglambo, pagpadali sa paglihok, ug magmugna og disaster-resilient transport systems sa Mindanao. (David Ezra Francisquete)
