GIBOMBAHAN sa Joint Task Force Central ang mga terorista sa SPMS Box ug Liguasan Delta hinungan sa pagpanghikling sa daghang mga molupyo sa Maguindanao del Sur.
Mga molupyo giingong nakabati sa mga dagkong buto nga nagsugod sa alas 8 sa gabii sa Sabado, Hulyo 5, sa gabii nga milungtad sa alas 3:00 sa kaadlawon sa Dominggo, Hulyo 6, 2025.
Base sa impormasyon nga nakadawat og taho ang 601st Brigade sa Philippine Army sa giingong presensiya sa mga terorista nga sakop sa Bangsamoro Islamic Freedom Fighters (BIFF-Karialan faction) ug Dawlah Islamiyah Hassan Group nga naa nagtago-tago sa SPMS Box ug Liguasan Delta.
Tungod niini, nilusad gilayon og decisive military operation ang Joint Task Force Central batok sa mga terorista.
Giingong pasulod pa lang ang mga sundalo sa ilang target, gipaarakan na sila og mga bala sa mga terorista hinungdan nga nibawos ang mga sundalo sa pagpabuto sa ilang mga armas nga nilungtad og pito ka oras nga binakbakay.
Aron maseguro, nigamit ang JTFC og mortar ug kanyon ug gibombahan ang gitagoan sa mga terorista nga giingong napatyan og lima samtang duna pay daghang naangol.
Pagsuwat ning balita, padayon ang clearing operation sa JTFC sa lugar kon diin naglublob ang mga teroristang BIFF-DI Hassan Group. (Edgar E. Fuerzas)