GIAWHAG sa Trabaho Partylist ang mga trabahante nga suportahan ang ilang kandidatura sa Kongreso aron mapasaka ug mamahimong balaod ang ilang mga repormang magtubag ang "isang kahig, isang tuka" nga panginabuhian sa mga Pilipino.
“Gusto namo nga makatigum mo. Inig uli ninyo sa inyong panimalay, dili na mo magproblema kung asa kuhaon ang inyong pang-emerhensiya. Mao nga hinaut among hangyo nga inyong suportahan ang 106 Trabaho Partylist,” matud pa ni Trabaho nominee Ninai Chavez sa Kuyog Ta! Grand Proclamation Rally nga gihimo karong buwan sa Abril.
Human sa nahisgutang mensahe, pormal nga gitaas sa Team Kuyog Ta ug Team I Lab U ang kamot ni Chavez, nga nag-inusarang partylist nga nahilakip sa maong sortie. Ang maong partido ang gipangunahan ni Dipolog City Mayor Dexter Uy nga ning kasamtangan, nidagan isip gobernador.
Lakip sa plataporma ni Uy ang pagpalig-on sa mga programa sa panginabuhian, turismo ug health services sa Zamboanga del Norte, nga suportahan sa Trabaho sa Kongreso.
Gawas sa pagpasalamat sa liderato ug suporta ni Uy, gipasalamatan usab ni Chavez ang liboan ka mga residente nga mitambong sa maong kalihokan kalakip na sab ang motorcade nga gihimo sa buntag.
“Grabe gyud kainit ang inyong pagdawat sa amo, mao nga samtang nag-motorcade mi ganiha, dili gyud nako mapugngan ang akong pagngisi kay kamo mismo nga nagtapok ug misugat sa amo, nagngisi gyud mo. Busa daghan kaayong salamat!,” matud pa niya.
Si Uy usab nagpasalamat sa ilang mga supporters: “Daghang salamat sa tanang katawhan sa Zamboanga del Norte sa inyong mainitong suporta ug aktibong pag-apil. Kamo ang inspirasyon sa among padayon nga paningkamot para sa tinuod nga kausaban ug maayong panggobyerno.”
Isip #106 sa balota, ang Trabaho Partylist nagpasalig sa mga reporma alang sa mga trabahante, sama sa mas taas nga suweldo, dugang nga mga benepisyo, ug patas nga oportunidad sa trabaho. (PR)