Trahedya nihamok sa 2024

Trahedya nihamok sa 2024
City Government of Davao

GIINGONG gihamok ang pagsulod sa Bag-ong Tuig 2024 sa Davao City og sagunsong mga trahedya.

Patay ug laing mga krimen nahitabo sa dakbayan; apan ang panghitabo mahimong masubay sa gipatuman nga "culture of security" nga mas nihatag og pangutana sa kampanya “Life is Here”. Gani gikan sa Enero 1 hangtud 6, karong tuiga, ang Davao City Police Office (DCPO) nakatala na og daghang insidente - kasagaran pagpatay ug reckless imprudence.

Sayo sa buntag niadtong Huwebes, Enero 4, usa ka 22-anyos nga babaye napalgang wa nay kinabuhi sa daghang mga samad dinunggaban sa lawas mga 50 metros gikan sa ilang balay sa Purok 4, Barangay Bayabas, Toril District.

Sa imbestigasyon nga gilusad sa Eden Police Station (PS19), ang biktima gitakda unta sa iyang binulan nga check-up sa maong adlaw nga siya napalgang patay. Samtang gikompirma sa pamilya sa biktima nga nipailawom og medikasyon ug regular nga pasyente kini sa Southern Philippines Medical Center (SPMC) tungod sa problemang mental.

Imposible sab alang sa biktima nga kutloon niya ang iyang kinabuhi kay naa matud pa siya sa maayong kondisyon usa bulan una ang insidente, matud pa sa inahan sa biktima.

Apan bisan pa sa maong kamatuoran, mga awtoridad naghangyo og autopsy report aron nga madeterminar ang hinungdan sa maong insidente.

Sa pikas bahin, laing insidente ang nahitabo sa Purok 1, Barangay 2-A nga naglambigit sa duha ka nag-abang og lawak nga namatay sa dunggab sa Huwebes sa buntag sa Enero 4.

Nasayran sa imbestigasyon nga mga biktima nag-abang og usa ka lawak sulod sa girentahan nga balay sa suspek sukad Disyembre 21, 2023 ug nagbayad lang og gamay nga kantidad ngadto sa suspek.

Mga biktima giila isip Jessel Joy Casantao Indoy, 15, ug Cora Oral Ansagit, 20, single mother, pulos lumad nga molupyo sa Barangay Salumay, Marilog District ning siyudad samtang ang suspek, giila isip Marcial Marzan Gonzales, 52, biyudo, ug laborer, kasamtangang nadetiner na sa San Pedro Police Station sa kasong double murder.

Gikompirma ni San Pedro Police Station Commander Police Major Marvin Hugos sa paghinabi sa radyo niadtong Biyernes, Enero 5, nga si Gonzales daling nisibat human sa insidente sa Palo Singko, Barangay Kapatagan, Digos City sa Davao del Sur, ug nadakpan pinaagi sa hot pursuit operation nga gilusad sa Digos Police Station ug Kapatagan Bus Terminal sa maong adlaw.

Matud sa suspek nga hubog siya sa dihang nahitabo ang insidente ug gumikan sa giingong kasaba sa maong mga biktima, napugos siya pagpatay kanila gamit ang wala pa masayring mahait nga butang.

Usa ka adlaw human sa maong niluog nga krimen, gitaho sa Toril Police Station (PS8) nga usa ka patay nga lawas napalgan sa Luisdeña Compound, Barangay Lizada, Toril niadtong Biyernes sa buntag, Enero 5.

Sa inisyal nga imbestigasyon, ang lawas sa biktima giingong napaig na sa usa ka luna.

Padayon pa ang imbestigasyon sa kapulisan sa maong hitabo.

Dugang pa nga usa ka lawas sa babaye nga nadugta na nakit-an sab nga naglutaw duol sa Capareda Compound, Coastal Road, Barangay 76-A Bucana niadtong Sabado sa buntag, Enero 6.

Sumala sa Ecoland Police Station (PS15) nga sa ilang imbestigasyon ang edarang babaye naa sa 60 - 70 anyos nga pangedaron nawala sukad pa Disyembre 22, 2023.

Sa pagkakaron, mga awtoridad nihimo na og search operation sa partner sa biktima aron nga maapil sa imbestigasyon.

Sa pikas bahin, mga namatay kay naligsan ug mga bangga sa mga sakyanan (road traffic accidents [RTA] and road traffic collisions [RTC]) nakapabalaka na sa Dabawenyos. Mga behikulo nag nalambigit kasagaran naila isip "semis-trucks and semi-tractor trucks".

Giingon sa DCPO ug road clusters nga nitubag sila og kapin 10 ka road related-incidents sa una pa lang nga semana sa tuig ug kasagaran kanila gipasakahan na og kasong Homicide, Serious Physical Injury, ug Damage to Property.

Mga insidente sa managlahing hitabo natala sa Crossing Fausta, Davao-Bukidnon Highway, Calinan, ug sa Carlos P. Garcia Highway, Kilometer 11 sa Sasa niadtong Enero 6.

Ang maong insidente niresulta sa pagkakalas sa usa ka kinabuhi sa maong han-ay.

Mga station commanders sa mga police stations nagmatuod sa SunStar Davao pinaagi sa telepono nga nihimo na sila og lawom ug balanse nga imbestigasyon sa matag krimen nga nahitabo sa ilang area of responsibility (AOR).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph