Trak nahaybol sa Marilog

DAW series sa action film nga "fast and furious" ang pagkahaybol sa Fuso wing van nga nangatangtang pa ang ligid niini atol sa disgrasya alas 8:40 sa buntag, kagahapon, Hulyo 24, 2024, sa Barangay Marilog Proper, Marilog District, Davao City.

Ang nahisgutang trak dunay sakay nga 500 ka sako sa feeds nga gimaneho sa usa ka Jerez Gemar Magdadaro, 46-anyos, taga Purok 4, Magsaysay, Malaybalay City, Bukidnon.

Suma pa nga samtang nagsubay ang trak sa Davao-Bukidnon Road gikan sa Bukidnon padulong og Davao City.

Giingong mikagar ang brake sa trak, rason nga nawad-an og kontrol ang drayber niini.

Ang trak midaro sa tulo ka sari-sari store sa dapit una kini nahaybol, natanggal pa ang ligid.

Wala hinuoy natala nga nasamdan sa maong aksidente. (JPC)