KIDAPAWAN CITY -- Nikagar ang makina sa Isuzu wing van, hinungdan sa pagkasirko niini ngadto sa pangpang alas 2:00 sa hapon, Martes, Hulyo 1, 2025, sa Alamada, probinsiya sa Cotabato.
Sa taho gikan sa Municipal Disaster Risk Reduction and Management Office (MDRRMO-Alamada) nga pasaka ang wing van sa Sitio Guo, Barangay Guiling, Alamada.
Apan kalit lang nikagar ang makina niini ug hinay-hinay nga niatras padulhog sa kalsada.
Gisulayan pa sa pagtunob sa drayber sa preno niini apan wala na gyud masalbar pa hinungdan nga nidiretso ug kahulog sa pangpang daplin sa kalsada.
Hinuon, luwas ang drayber ug helper sa wing van nga nakaambak gikan sa trak.
Daling gitabangan sa mga molupyo sa dapit ang drayber ug helper sa taas nga bahin sa pangpang daplin sa kalsada.
Niresponde sab gilayon ang mga sakop sa MDRRMO-Alamada ug gipaguyod ang wing van sa bulldozer sa lokal nga panggamhanan sa Alamada.
Sa pikas bahin, pasakaan og kasong kalapasan sa Republic Act 9165 o Comprehensive Dangerous Drug Act of 2002 ang drug pusher nga nadakpan sa mga awtoridad alas 4:00 sa hapon, Martes, Hulyo 1, 2025, sa Sultan Kudarat, Maguindanao del Norte Province.
Giila ang suspek nga si alyas Rajah, 35-anyos, minyo, ug nagpuyo sa Barangay Simsiman Pigcawayan, Cotabato Province.
Gibutyag sa tigpamaba sa Police Regional Office-Bangsamoro Autonomous Region (PRO-BAR) Lieutenant Colonel Jopy Ventura nga nagpahigayon og drug buy-bust operation ang mga sakop sa Philippine Drug Enforcement Group (PDEG-Barmm) sa Barangay Dalumangcob, Sultan Kudarat.
Sa dihang gitunol na sa suspek ang shabu ngadto sa ahente sa PDEG, gisikopo gilayon siya.
Nasakmit gikan sa posisyon ni Rajah ang 100 gramos nga shabu nga nagkantidad og P680,000 base sa drug market value ug usa ka motorsiklo.
Ang suspek gikonsidera nga high value target ug dugay na nga gisundan sa mga awtoridad.
Balhog na ang suspek sa prisohan sa PDEG-Barmm ug pasakaan og tukmang kaso. (Edgar E. Fuerzas)