DAVAO DE ORO -- Gibuhian ang drayber sa truck nga dunay karga nga mga sinakong bugas kinsa giingong gidakop sa mga pulis sa Barangay Manat, Nabunturan sayo sa buntag niadtong Martes, Mayo 6, 2025.
Gidakop mao si Nelvin Pojas Macilliones, 39-anyos, drayber sa ASM General Merchandising Company ug molupyo sa Barangay Tapia, Montevista.
Sa saysay sa drayber, gibutyag niini nga igo lang siyang nag deliver sa maong mga bugas ug samtang nagdiskarga sa mga sinakong bugas, iyang nabantayan nga dunay mga tawo nga nag video kaniya ug wa madugay niabot ang mga pulis.
Gisulti ni Macilliones nga gisita siya, gipangutana kung para asa ang maong mga bugas ug kay igo lang nag-deliver nitubag siya nga, “Wa ko kabalo ani, sir, igo lang ko mibiyahe ani, sir, nanarbaho lang ko."
Apan luyo sa maong tubag, mga pulis padayong nagsukit-sukit, nangutana kung ang maong mga bugas iya ba sa politiko.
Apan wa siya’y natubag gumikan kay igo lang kining naghatud sa mga bugas.
Sumala pa nga naratol ug nahadlok si Macilliones hinungdan nga nanawag kini sa ilang manager sa kompaniya ug wa madugay niabot ug maoy nakig-istorya sa mga pulis apan giingon nga luyo sa gihimong pagpasabot, gidala gihapon ang drayber ngadto sa buhatan sa kapulisan.
Bisan sa giingon nga ang pagdakop, wala masayod si Macilliones sa kalapasan nga iyang nahimo hangtud nga gidala siya sa presinto ug didto na nakatulog.
Miyerkules, Mayo 7, 2025, sayo sa kagabhion, si Macilliones gibuhian gumikan kay wa’y kaso o reklamong napasaka batok kaniya.
“Nasobrahan ang mga kapulisan sa ilahang pagdakop sa among drayber nga igo lang ni-deliver,“ pamahayag sa usa sa mga staff sa ASM Company.
Giingon nga nahulog nga illegal detention ang nahimong lakang mao nga dali nga gipagawas sa prisohan ang drayber human nigawas ang resolusyon gikan sa korte, dugang pahayag sa staff.
Gisulayan pag-adto ning tigsuwat ang Nabunturan Municipal Police Station aron pagkuha sa habig sa kapulisan apan sa unang pag-adto, Mayo 7, 2025, sa alas 12 sa udto, wala ang giingong imbestigador nga mao unta'y makatubag, apil na ang drayber nga gidetinar kay matud pa gidala ngadto sa piskalya.
Nakita ning tigsuwat ang truck nga gitanggong nga dunay karga sa gituohang mga bugas nga gitabunan og trapal.
Mibalik ning tigsuwat alas 9 sa buntag, Huwebes, Mayo 8, 2025, luyo sa kasayuran nga gibuhian na ang drayber aron klarohon ang isyu ug madungog ang habig sa kapulisan.
Apan giingon nga wa ang hepe, lakip na ang imbestigador gumikan kay adunay gilakaw. (Dexter T. Visitacion)