TULO ka tawo ang naangol sa pagkahugno sa tulay alas 10:00 sa buntag, Sabado, Oktubre 26, 2024, sa Alamada, probinsiya sa Cotabato.
Mga biktima nga nakaangkon og bun-og sa nagkadaiyang parte sa ilang lawas pulos molupyo sa Sitio Teren-Teren, Barangay Upper Dado, Alamada, Cotabato.
Gibutyag ni Alamada Mayor Jesus Sacdalan nga atol nga patabok ang multicab sa Macabasa Bridge sa Sitio Teren-Teren kalit lang nahugmak ang tulay.
Nahulog ang multicab sa tulay nga daling gitabangan sa mga nakasaksing molupyo sa dapit.
Tungod kay ginagmay nga mga bun-og lamang sa lawas ang nahiaguman sa mga sakay sa multicab ug wala na gidala ngadto sa balay tambalanan.
Nasayran nga tungod kay nagsige og baha, nakabkab na ang ilawom nga bahin sa tulay anga maoy gilantaw nga hinungdan sa pagkahugmak niini, ilabi na nga gama lang ang tulay sa kahoy.
Nihangyo ang mga molupyo sa dapit nga unta maayo ang tulay o kaha tukuran og bag-o aron dili na sila maglisud sa pag-agi. (Edgar E. Fuerzas)