KIDAPAWAN CITY - Bungkag ang usa ka tulunghaan nga giigo sa kusog nga hangin kon buhawi alas 4 sa hapon, Martes, Enero 16, 2024 didto sa probinsiya sa Cotabato.
Gibutyag sa mga personahe sa Municipal Disaster Risk Reduction and Management Office (MDRRMO) sa Magpet nga nakadawat sila og taho sa tulunghaan nga giigo sa kusog nga hangin nga daw buhawi didto sa Barangay Sallab, Magpet North Cotabato.
Pag-abot sa mga nagresponde nga sakop sa MDRRMO ilang nakita nga gilangkat sa kusog nga hangin ang atop sa Batongbasag Elementary School sa lungsod sa Magpet.
Matud ni School Principal Harrison Lamata nga walay naangol sa pag-igo sa kusog nga hangin gawas lang sa nalangkat nga atop gumikan una na silang nagdeklara og class suspension sa nasinatiang kusog nga pag-ulan.
Ang lawak-tulunghaan nga naguba ang atop gihimo nga makeshift classroom sa mga kindergarten learners sa Batongbasag Elementary School sa Sitio Batongbasag.
Gumikan niini wala na kini gipagamit sa mga kindergarten learners gumikan delikado na kaayo og gibalhin na lang sila sa laing classroom samtang gi-ayo pa ang tulunghaan nga giigo sa buhawi.
Nagpasidaan ang LGU-Magpet nga mag-amping gyud ilabina kung ting-ulan sa posibleng baha, landslide ug pag-igo sa kusog nga hangin.