Ukay-ukay vendor gipusil sa anak

Ukay-ukay vendor gipusil sa anak
Hulagway iya sa Cotabato City Police Station.

COTABATO CITY — Away sa pamilya ang gilantaw sa mga awtoridad nga motibo sa pagpamusil sa usa ka negusyante alas 7 sa gabii, Dominggo, Pebrero 11 sa siyudad.

Giila ang biktima nga si Usop Amad, 57-anyos, minyo ug molupyo sa Purok Lumbayanagi Barangay Kalanganan 2 Cotabato City.

Gibutyag ni Cotabato City Police Director Colonel Querubin Manalang nga nagkalalis ang biktima og iyang anak nga si alyas Moymoy gumikan sa personal nga problema sa ilang pamilya.

Tungod sa kasuko sa suspek gipusil niini ang iyang amahan gamit ang kalibre .45 nga pistola.

Abtik sab nga miikyas ang suspek sakay sa usa ka motorsiklo paingon sa Maguindanao del Norte.

Abtik nga gisapupo ang biktima sa iyang pamilya ug gidala sa Cotabato Regional and Medical Center (CRMC) ug anaa sa talandugong kahimtang gumikan sa mga samad-pinusilan sa nagkadaiyang parte sa iyang kalawasan.

Sa kasamtangan ang kapulisan sa dakbayan sa Cotabato ang padayon nga nag-imbestiga sa pagpamusil sa biktima ug paglutos sa iyang anak. 

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph