KIDAPAWAN CITY — Personal nga away ang gilantaw nga motibo sa pagpatay sa usa ka negusyante alas 10 sa buntag, Sabado, Marso 16, 2024 sa probinsiya sa Cotabato.
Giila ang biktima nga si Joy Labrado, negusyante ug nagpuyo sa Barangay Bato, Makilala, Cotabato.
Ang suspek nailhang si Joel Buenda, usa ka security guard nga taga Barangay Marbel, Kidapawan City.
Matud ni Makilala Municipal Police Station, Chief of Police, Lieutenant Colonel Britz Sales nga gisulong sa biktima ang sekyu sa Sitio Sta. Cruz, Brgy. Poblacion, Makilala gumikan sa personal nilang bingkil nga misampot sa grabeng panaglalis.
Tungod sa kasuko sa sekyu kalit niining gituok ang biktima dungan sa pag dukdok sa ulo gamit ang bato.
Patay gilayon si Labrado nga nabuak ang ulo kinsa wala na nadala sa balay-tambalanan.
Atol nga nagresponde ang mga pulis misurender dayon ang suspek ug miangkon sa kremin nga iyang nahimo.
Gibalhog na ang suspek sa prisohan sa Makilala MPS ug pasakaan og kasong murder.