MILUSAD ang Davao City Police Office (DCPO) og fitness campaign sa dakbayan nga nagdasig sa mga tambok nga mga pulis nga mopailawom og regular nga pisikal nga aktibidad, human sa direktiba gikan Philippine National Police (PNP) aron nga ipatuman ang istrikto nga kasibo nga sukdanan.
Gisulti ni DCPO spokesperson Captain Hazel Tuazon niadtong Hunyo 18, 2025 sa press briefing nga ang programa maoy tubag sa giduso sa liderato sa PNP aron mapalambo ang pisikal nga kondisyon sa mga pulis.
Ubos sa inisyatibo, mga personahe sa DCPO ilabi na kadtong nisobra na sa gilimitar nga gibug-aton, mosalmot sa mga aktibidad sama sa pagdula og volleyball, basketball, ug zumba, sinemana o kaduha sa usa ka semana.
Dugang pa niya nga mga pulis nga nailhan nga sobra sa timbang hugot na karong gi-monitor ug hatagan og prayoridad sa programa, subay sa mando gikan sa PNP chief.
Dugang ni Tuazon nga ang DCPO duna na'y listahan sa mga sakop niini kinsa gikinahanglan nga moapil.
Gipahimug-atan ni Tuazon nga ang physical fitness esensiyal aron nga epektibo ang pulis sa iyang trabaho, ug nagtin-aw nga mga pulis kinahanglan nga naa sa maayong porma aron nga tukma ang paghimo sa ilang mga tahas. Bisan kon giila ang natural nga tendensiya nga mobug-at tungod sa edad, gipahimug-atan niini nga di kini makababag sa trabaho sa pagpamulis.
Sayo niini, si PNP Director General Nicolas Torre III nagbahad sa mga pulis kinsa mapakyas nga makuha ang gikinahanglan nga fitness standards sulod sa usa ka tuig nga mag-atubang og "dismissal". Iyang gitumbok ang Republic Act 6975, o ang Department of the Interior and Local Government Act, nga nagmando nga ang pulis kinahanglan nga di mosobra sa singko kilogramos subay sa standard weight sa ilang mga gitas-on, edad ug pagkatawo.
Matud ni Torre nga ang PNP nakig-koordinar uban ang National Police Commission bahin sa mga pulis nga dunay mga medical nga kondisyon.
Samtang gitin-aw sa DCPO nga kadtong dunay balido nga health issues mahimong mabalhin ngadto sa administrative roles o magproseso og disability discharge. (David Ezra Francisquete)