TAGUM CITY, Davao del Norte -- Usa ka lawom nga imbestigasyon ug hugot nga hot pursuit operation ang gihimo karon sa Tagum City Police Station aron madakpan ang tulo ka mga lalaki nga responsable sa pagpatay sa 19-anyos nga estudyanteng babaye, Miyerkules sa kaadlawon, Hulyo 9, 2025, sa Purok 3-A, La Filipina, ning siyudad.
Sumala ni Davao del Norte Provincial Police Office (DNPPO) spokesperson Police Major Anjanette Tirador nga nihimo na og lawom nga imbestigasyon ang kapulisan sa Tagum aron madakpan sa hinanaling panahon ang mga responsable sa krimen.
Una niini, napalgang wala nay kinabuhi ang biktima nga si alyas Nicole, giingong tinun-an sa University of the Philippines (UP) sa kaulohan kinsa nakahiagom og daghang bun-og ug mga samad-dinunggaban sa nakadaiyang parte sa iyang lawas sulod sa lawak niini.
Subay sa taho sa kapulisan, nasayran nga ang biktima bag-ohay lang nakauli sa ilang pinuy-anan.
Nasayran sab nga nag-inusara ang biktima sa iyang lawak samtang naa sa laing kuwarto ang iyang mga ginikanan.
Nagtuo ang pamilya nga kawat ang motibo sa krimen tungod kay nawagtang ang mga personal nga gamit sa biktima lakip ang iyang cellphone, tablet, ATM cards ug uban pa.
Nasubay sab sa CCTV footage nga may tulo ka mga lalaki ang migawas sa balay sa biktima.
Napunitan sa crime scene ang dumb bell, sundang ug ubang mahait nga butang nga gituohang gigamit sa pagpatay sa dalaga.
Gipalawman sa kapulisan ang imbestigasyon aron madakpan ang mga responsable sa krimen. (Jeepy P. Compio/July Aubrey Revilla-Ngo)