DUGANG pas-anon nga reyalidad sa mga drayber sa pampasaherong sakyanan ang posibleng pagtaas sa presyo sa lana karong semanaha, nga giila na usab nga laing hagit sa ilang inadlaw nga paningkamot.
Sa tan-aw sa Oil Industry Management Bureau sa Department of Energy (DOE), base sa unang upat ka adlaw sa trading, posibleng mosaka og P1.50 matag litro ang gasolina, samtang ang diesel mosaka og P1 ug ang kerosene sa P0.80 matag litro.
Apan gipasabot sa DOE nga magdepende pa kini sa resulta sa ulahing trading karong adlawa. Ang opisyal nga anunsiyo ipaabot karong adlawa, Lunes, Agusto 4, ug ipatuman na dayon ang bag-ong presyo ugma, Martes, Agusto 5.
Usa sa mga nagpakita og kabalaka mao si Leoncio Pacuri, 49 anyos, usa ka PUJ driver nga taga Barangay Wilfredo Aquino, Agdao District diin sa iyang gisaysay nga bisan unsaon, wala na kuno mahimo ang mga yanong drayber, kon di mosunod sa gipatuman sa mga dagkong kompaniya sa lana.
“Bisan unsaon namo, wala na mi mahimo. Sundon gyud namo ang mando sa mga dagko nga kompaniya. Kami nga mga gagmay nga drayber, mosalo ra gyud sa kalisod,” ingon ni Pacuri.
Si Pacuri nidugang nga kada adlaw, sa tibuok biyahe niya, makadala ra siya og P500 pauli sa pamilya, nga kuwang pa gyud sa ilang inadlaw nga gasto.
Ang pagtaas sa presyo sa lana gitan-aw nga usa sa mga hinungdan mao ang gipatuman nga sanctions ni US President Donald Trump batok sa lana sa Russia ug Iran, ingon man ang pagkabaskog sa kalihukan sa ekonomiya human sa bag-ong trade deal tali sa America ug European Union.
Ang mga drayber ug commuters karon nag-atang na sa pinal nga anunsiyo, nga posibleng usa na sab ka dakong kabag-ohan sa inadlaw nga kinabuhi. (Jeepy P. Compio)
