Utangan gipatilaw og kinumo

Davao City Police Station 2
Hulagway kuha ni Jeepy P. Compio

MISANGKO sa pagpapulis human nga gikumo sa usa ka ginang ang babaye nga nakautang kaniya niadtong Sabado, Hunyo 22, 2024, sa Madapo Hills, Barangay 8-A, Davao City.

Midangop sa San Pedro Police Station ang usa ka Renalyn, 29 anyos, human siya sumbaga sa iyang nautangan nga si alyas Nadeth.

Nasayran nga giadtoan ni Nadeth si Renalyn sa ilang balay kay wala na kini ni-reply sa Messenger, ug bisan tawagan dili motubag.

Nakahukom si Nadeth nga adtoan siya sa balay kay naabot na sa lima ka bulan ang utang niini nga P5,000 luyo sa sabot nga duha ka bulan lamang.

Sa kalagot ni Nadeth, kay mitubag-tubag kaniya si Renalyn ug naulawan kuno siya nga siya pa’y giutangan, gisumbag niya kini.

Dali sab nga midangop sa kapulisan si Renalyn aron ipa-blotter ug nakahukom kini nga mopasaka'g kaso sa nautangan.

Ang maong hitabo gidangop na sa barangay aron sila husayon. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph