KATORSE ka tawo patay, tanan sila sakay sa pasaheroang van, human kini gidaro sa dakong trak ug misilaob sa probinsiya sa Cotabato, alas 12:15 sa udto, Lunes, Marso 25, 2024.
Sa uwahing tala gikan sa kapulisan, ang 14 ka patay gikan sa van, samtang duha ang angol sa sakay niini nga gitambalan sa bay tambalanan, ug laing 3 ang samaran sab nga sakay sa trak.
Suma ni Cotabato Police Provincial Director Colonel Gilberto Tuzon nga paingon ang pasaheroang van sa Kidapawan City gikan sa Arakan, North Cotabato.
Ang van puno og mga pasahero nga pauli sa ilang mga dapit.
Dugang pa nga sa pag-abot sa van sa pakurbada nga kalsada sa Barangay Luhong, Antipas, Cotabato gidaro kini sa kasugat nga trak nga puno og karga nga balas.
Sa kakusog sa impak, daling misilaob ang van ug nalabay sa kilid nga bahin sa kalsada.
Sa mga hulagway nga makita sa social media, makita ang mga pasahero nga nangalabay gawas sa van, nangapaig na, samtang ang uban miaksiyon pag-agi pinaagi sa bintana sa van aron maluwas.
Luyo sa van, nasunog sab ang trak diin ang drayber ug helper niini nangaangol sab nga abtik nakaambak human sa aksidente.
Subay sa imbestigasyon, nawad-an og preno ang trak ug nadaro ang van nga gikasugat niini.
Mga biktima sa insidente padayon pa nga giila sa kapulisan human sila mangasunog ug imbestigasyon sa mangilngig nga aksidente nagpadayon.(EEF)