PORMAL na nga gipasaka ang kaso sa Police Regional Office (PRO) Davao Region ug Anti-Cybercrime Group (ACG) batok sa vlogger nga nagpakatag og fake news sa giingong sa pagronda sa balay ni kanhi Presidente Rodrigo Roa Duterte (FPRRD).
Sumala ni Philippine National Police (PNP) Public Information Officer (PIO) Chief Police Colonel Randulf Tuaño nga alas 12 sa udto, Mayo 6, 2025, pormal nga gipasaka ang kaso.
Nasayran nga ang nahisgutan mag-atubang og kasong kalapasan sa Article 154 sa Revised Penal Code o Unlawful Use of Means of Publication and Unlawful Utterances, kalabot sa Section 6 sa Republic Act 10175 o ang Cybercrime Prevention Act of 2012.
Kahinumdoman nga makita sa video sa vlogger ang giingong 30 ka mga sakop sa Criminal Investigation and Detection Group (CIDG) ug 90 ka mga Special Action Forces (SAF) nga alegasyong gikan sa Luzon miabot sa panimalay sa mga Duterte.
Kini ang rason nga gilayong nagpunsisok ug nanggibantay ang mga supporters ni FPRRD sa gawas sa balay niini sa Doña Luisa Subdivision, Matina, Davao City.
Lakip ang balay ni incumbent Davao City First District Congressman Paolo Duterte alegasyong rondahon, hinungdan nga dunay mga tarpaulin sa gawas sa balay niini nga dunay mga nakasulat sa mga kalapasan labot sa "planting of evidence."
Gipasabot sa nasyonal nga pulisya nga dayag suma pa nga fake news, o makita gayud nga disinformation campaign sa video niini.
Bisan pa og giingong fake news ang mikatag, dili gihapon kampante ang mga supporters, maong wala pa gihapon sila mihawa sa gawas sa balay ni FPRRD. (Jeepy P. Compio)