GISUGDAN na sa lokal nga panggamhanan sa Davao City, pinaagi sa City Disaster Risk Reduction and Management Office (CDRRMO) ug sa City Social Welfare and Development Office (CSWDO), ang serye sa lima ka adlaw nga disaster resilience capacity-building nga nagtumong sa flood-prone nga mga barangay nga gideklara og state of calamity niadtong 2024.
Gitug-an ni CSWDO Emergency Section Head Annabelle Lugo sa Madayaw Davao sa ikaduhang adlaw sa pagbansay nga gipahigayon sa Talomo B Barangay Hall, nga ang tumong sa lima ka adlaw nga pagbansay aron andamon ang mga komunidad por-in-kaso sa panghitabo ug panggamhan sila aron aktibo nga motubag sa panahon sa emerhensiya.
“Actually, naa ta karon five days training actually lima ni ka batch, gipahigayon ni didto sa mga barangay nga na-declare under state of calamity atong January 2024,” bugyag ni Lugo.
Ang nisalmot sa pagbansay, sumala ni Lugo, mao ang mga batan-on, solo parents, kababayen-an, ug persons with disabilities. Ilang gitutukan ang mga molupyo ug gipahimug-atan nga sila maoy mamahimong volunteer forces, nga modugang sa mga gibansay nga barangay responders ug mga personahe sa Central 911.
“Nagtutok mi karon lumulopyo sa ground kasi sila dapat ang first responder. Ilang makat-onan diri dili lang nila magamit sa ilahang barangay pero magamit nila mismo sa ilahang panimalay,” pagpasabot ni Lugo.
Sa lima ka adlaw nga pagbansay, mga nisalmot makahibalo sa pag-organisa sa komunidad, pagbangbang sa kalayo, basic life support, radio operation, ug daghan pang katakus.
Sa uwahing adlaw, mopailawom sab sila og simulation exercise o Simex sa emerhensiya.
“Everybody should have a vital role in disaster response,” pagtin-aw niya, ug dugang nagsulti nga matag kahanas o kahibalo, bisan unsa man kini ka gamay, magamit kini sa katalagman ug dakong tabang kini sa komunidad ug sa gobyerno sa panahon sa kalamidad.
Dugang pa ni Lugo nga molusad sab sila og pagbansay sa Talomo A alang sa ikaduhang hugna, City Poblacion A sa ikatulong hugna, Buhangin A sa ikaupat, ug Bunawan, San Isidro, ug Barangay Lasang alang sa ikalimang hugna. (CIO-Davao)