GISULTI ni Vice President Sara Duterte nga gibutang nila ang tibuok nga pasalig sa mga huwes sa International Criminal Court (ICC) nga makiangayon sa kaso ni kanhi Presidente Rodrigo Duterte.
"But we still give our trust, our full trust to the judges and the ICC court that they will be fair, and that they will be unbiased and that they will be objective in assessing all the petitions of the defense counsel," matud ni Sara atol sa paghinabi sa mga tigbalita niadtong Mayo 31, 2025, sa Laan van Reagan en Gorbatjov Park sa The Hague.
Dugang ni Sara nga gawas sa pagsalig ngadto sa mga huwes sa ICC, nakadawat sila og mga taho sayo pa lang sa 2023 bahin sa gialegar nga saksi nga gimaniobra sa mga imbestigador kinsa niari sa Pilipinas.
Ug tungod sa maong alegasyon, nagsuwat sila ngadto kang President Ferdinand "Bongbong" Marcos Jr. aron mangayo sa iyang posisyon sa imbestigasyon nga gilusad sa ICC.
Gisulti sab sa Vice President nga kung ang iyang amahan, Rodrigo, gitugtan nga makauli sa Pilipinas, di niya gukdon ang iyang mga kontra sa politika. Kay sa tibuok niyang karera sa politika, wala gyud gitarget ni Rodrigo ang nikontra niya.
Gitumbok ni Sara nga pananglitan si kanhi Senador Antonio "Sonny" Trillanes IV, kinsa dayag kaayong nagsaway kang Duterte gikan sa 2015 hangtud 2017 ug bisan sa uwahing mga katuigan. Iyang gisulti nga si Trillanes padayong nagpapili ug pabaling aktibo sa natad sa politika.
"For me, talking about President Duterte is nothing, no harm is befell him. So, that is not the attitude. It's not a critical analysis," pagklaro niya.
Butyag niya nga ang defense team ni Rodrigo Duterte nangandam na alang sa pagdungog sa Septyembre ug nagtrabaho sulod sa probisyones sa Rome Statute aron mapadali ang pagbasura o pagbuhi sa kanhi presidente.
Iyang gikaistorya si Atty. Harry Roque niadtong Mayo 30, ug naa siya'y nakakita siya og posibleng legal nga estratihiya alang sa pagbuhi kang Duterte.
Gipadayag sab ni Sara nga ang pagdungog sa Senado nga gilusad ni Senador Imee Marcos niadtong Abril 29, 2025, dako kaayo og tabang sa kaso ni Duterte.
Matud niya nga daghang tawo naghiusa aron nga dalhon ang kanhi presidente sa The Hague.
Gani giduso na ni Imee ang chairperson’s report ngadto sa Office of the Ombudsman, ug nag-ampo na sila karon nga mga kaso mapasaka batok sa mga responsable.
Kahinumdoman, gibitbit si Rodrigo ngadto sa The Hague, Netherlands, niadtong Marso 11 tungod sa gialegar nga crimes against humanity.
Nipatim-aw siya sa ICC niadtong Marso 14 alang sa pre-trial hearing, ug kompirmasyon sa charges hearing nga gitakda sa Septyembre 23.
Kapin na 70 ka adlaw sukad nga gidala si Duterte sa The Hague. (Rojean Grace G. Patumbon)