GIPASALAMATAN ni Vice President Sara Duterte si President Ferdinand Marcos alang sa "renewed connection" uban sa iyang amahan, kanhi Presidente Rodrigo Duterte.
“This is ironic but I have thank Bonbong Marcos because there was forgiveness between me and FPRRD for all that has happened in our lives,” matud niya sa live interview, Martes, Abril 1, 2025.
Gipaambit ni Sara nga siya ug ang iyang amahan duna na karo'y "father-daughter relationship."
Iyang gi-esplikar nga samtang nagbisita kang Rodrigo, makig-istorya siya kaniya isip iyang anak babaye, kay mga abogado ni Rodrigo wala tugti nga maghisgut og mga legal nga butang uban kaniya.
Iyang gipadayag nga ang iyang pagbisita kang Rodrigo mao ang pinakataas nga panagtagbo nga nasinati uban ang iyang amahan, tungod kay samtang nagtubo, si Rodrigo kanunay nga okupado sa trabaho ug nagserbi sa nasud.
Apan karon si Sara maka-istorya na sa iyang amahan matag adlaw ug nabati og panalangin.
Matud niya nga kung makabalik si Rodrigo sa Davao City ug mapili isip mayor, posibleng okupado na sab siya sa iyang trabaho.
“Nabigyan kami ng time na makapag-usap as father-daughter sad lang kay it has to happen inside the detention center but yes, thank you sa kanya,” pahayag niya.
Gisulti sa Vice President nga bisan sa mga hagit nga iyang giatubang, sama sa impeachment ug ang gialegar nga pagdetiner kang Rodrigo, malipayon siya tungod kay uban siya sa iyang igsuong babaye, Veronica “Kitty” Duterte, ug ang ilang relasyon milig-on.
Tug-an ni Sara nga naghuwat siya sa pagproseso sa usa ka dokumento sa Netherlands una siya makatapos sa iyang trabaho didto. Kung mahapsay na kini, nagplano siya nga mobalik sa Pilipinas.
Kabahin sa UniTeam, matud ni Sara nga ang iyang amahan wala magbasol kaniya nga nakig-uban sa Marcoses.
Dugang pa niya nga bisan kung nidagan siya alang sa pagka-bise presidente, matud ni Rodrigo nga di siya manghilabot sa mga "decision-making, leaving them to decide."
Matud niya nga si Rodrigo di ang matang sa tawo nga nagabasol sa uban sa bisan unsang partikular nga sitwasiyon.
Gipaneguro niya nga si Rodrigo "is doing well," ug si Kitty nagbisita kaniya.
Nihatag og katikaran si Kitty sa iyang amahan bahin sa kahimtang sa pamilya, unya nagpaambit lang og mga positibong mga balita aron sa pagdasig sa iyang kaugalingon.
Nahinangop si Rodrigo sa dihang nasayran nga mga tawo nagsaulog sa iyang adlaw'ng natawhan isip suporta kaniya.
“I told him of the support of the people of the world and in the Philippines,” tug-an niya.
Gipasalig niya nga ang iyang mga igsuon, Paolo “Pulong” Duterte ug Sebastian “Baste” Duterte, mobisita sa iyang amahan apan puli-puli lang.
Kung usa kanila ang mobiya sa Netherlands, laing usa na sab ang mopuli.
Kahinumdoman, gidala si Rodrigo sa The Hague, Netherlands, tungod sa iyang gialegar nga crimes against humanity niadtong Marso 11.
Ang pre-trial hearing nahitabo sa Marso 14, ug ang International Criminal Court (ICC) nagtakda sa confirmation of charges hearing sa Septyembre 25. (Rojean Grace G. Patumbon)