VRU: Nisupak sa 'anti-smoking' ordinance sa Davao City mas nidaghan

VRU: Nisupak sa 'anti-smoking' ordinance sa Davao City mas nidaghan
File photo

MAS daghang nakalapas sa Anti-Smoking Ordinance ang nasikop sa Vices Regulation Unit (VRU) ug Davao City Police Office (DCPO) sulod sa unang tulo ka buwan sa 2024 kon itandi sa samang panahon sa miaging tuig.

Kini ang gibutyag ni VRU Officer-In-Charge Hernando Q. Las sa interbyu sa Madayaw Dabaw niadtong Martes, Mayo 14, 2024.

Sumala sa opisyal nga ang kinatibuk-ang ihap sa mga nadakpan alang sa Anti-Smoking Ordinance, gikan sa Enero hangtud Marso 2023, anaa sa 1,630 samtang ang kinatibuk-ang ihap alang sa Enero hangtud Marso 2024 moihap sa 1,772.

Matud usab ni Las nga ang City Treasurer's Office nakakolekta og P1,489,000 gikan sa Anti-Smoking citation tickets sa unang quarter sa tuig, nga mas ubos sa koleksyon sa miaging tuig nga P1,575,500.

Dugang ni Las nga gipasaka usab ang mga kaso batok sa 57 ka mga tawo nga wala makabayad sa ilang Anti-Smoking citation ticket sulod sa tulo ka adlaw nga trabaho. Kini mao ang una, ikaduha, o ikatulo nga paglapas.

Giingon sab sa opisyal nga nga 50 ka enforcers ubos sa ilang buhatan, inabagan sa mga boluntaryo, nagpadayon sa ilang monitoring.

Ang VRU gidugangan usab sa mga deputized police officers gikan sa DCPO.

Ang DCPO midugang usab sa ilang anti-smoking operations gikan sa 683 sa unang quarter sa 2023 ngadto sa 4,769 karong tuiga.

Ang Comprehensive Anti-Smoking Ordinance sa dakbayan mag-22 sa Mayo 31, dungan sa pag-obserbar sa World No Tobacco Day. (Jeepy P. Compio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph