PERSONAL nga bikil usa sa mga gituohang hinungdan sa kamatayon sa motorcycle drayber nga gipusil sa wala mailhing mga armado alas 5:40 sa buntag, Abril 21, 2024, didto sa Rotary Park, Pioneer Avenue, Barangay Magugpo Poblacion, Tagum City.
Sa report gikan sa Tagum City Police Station, naabtan nila ang biktima nga wa nay kinabuhi ug nagbuy-od ug naligo sa iyang dugo tupad sa usa ka TMX nga motor.
Gihulagway kini sa otoridad nga nagsuot sa itum nga tshirt ug pantalon, may gitas-on nga 5’5”.
Dugang sa imbestigasyon nga samtang nagmaneho ang biktima sa iyang motor, pag-abot niini sa Pioneer Ave., Magugpo, Poblacion usa ka wala mailhing lalaki ang mipusil sa biktima sa makadaghang higayon.
Giingong nakadagan pa ang motorsiklo og pila ka metros una kini nabangga sa nakaparada nga sakyanan.
Sa pagsusi sa otoridad, narekober ang pawnpaper gikan sa biktima nga may ngalan nga Nasser T. Arakama nga molupyo sa Mabini, Davao De Oro.
Ang patay’ng lawas sa biktima gidala ngadto sa Villagan Funeral Homes. (Dexter T. Visitacion)