Wa pahulama'g motor gipatay

Wa pahulama'g motor gipatay
Montevista Municipal Police Station

PATAY ang 36-anyos nga lalaki human pusila sa iyang bayaw sa Purok 3, Barangay Camantangan, Montevista alas 3:40 sa hapon, Mayo 29, 2024.

Ang biktima giila nga si Christopher Amang Sungcuan samtang ang suspek mao si Mark Aumento Benigno, 26-anyos, mag-uuma, pulos molupyo sa Purok 3, Barangay Camantangan, Montevista.

Base sa inisyal nga imbestigasyon, ang biktima gipasumonan sa suspek sa buhatan sa barangay kapitan gumikan kay matud pa giguba niini ang balay ni Benigno human nga wa siya nisugot nga hulman ang iyang motorsiklo.

Sa dihang nadawat sa biktima ang sumon gikan sa barangay, nasuko kini og giatake og kutsilyo ang suspek apan giingon nga napugngan kini sa iyang ginikanan.

Niuli matud pa ang biktima sa ilang balay ug sa dihang nibalik, nagbitbit na kini’g sundang apan sa dihang nakit-an sa suspek nga moatake kaniya ang biktima, gipusil niya kini sa makausang higayon gamit ang Caliber .22 rifle nga maayong pagkaigo sa dughan ug natumba.

Giingon nga giduol sa suspek ang biktima ug subling gipusil gamit ang samang armas tumong sa liog ug ulo.

Human sa krimen, ang suspek boluntaryong nisurender sa Montevista Municipal Police Station.

Samtang ang armas nga gigamit sa pagpusil sa biktima gitunol sa amahan sa biktima nga si Sornito Siarot Sungcuan ngadto sa mga niresponding mga pulis sa dapit diin nahitabo ang krimen.

Gibutyag nga naabtan pa sa mga pulis ang biktima nga nagbuy-od sa yuta hinungdan nga gidali pagdala ngadto sa balay tambalanan apan gideklarang dead on arrival.

Anaa karon sa kustodiya sa Montevista MPS ang suspek lakip ang armas nga gigamit sa pagpatay sa biktima alang sa tukmang kasong ipasaka kaniya. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph