TULO ka mga indibiduwal ang nangadakpan sa tinugyanan sa balaod sa managlahing kaso ug lugar sa Davao City karong semanaha.
Unang nadakpan ang duha ka mga suspek sa ilegal nga druga sa gihimong buy-bust operation sa Purok 2, Barangay 5-A, Davao City alas 12:30 sa tungang gabii, Hulyo 31, 2025.
Ang mga nadakpan giila nga si alyas Anwar, 30-anyos, construction worker, lumad sa Lanao del Sur ug iyang live-in partner nga si Alexis, 30-anyos, Davao City, pest control worker, ug pulos mga residente sa maong lugar.
Gipahigayon ang operasyon sa San Pedro Police Station Drug Enforcement Team (SDET) ubos sa pangpanguna ni Police Major Emmanuel D. Manlatican, station commander sa PS-2, uban sa koordinasyon sa PDEA-Davao.
Ang mga suspetsado nasikop human makig-transaksiyon sa usa ka undercover police nga nipalit og usa ka pakite sa gituohang shabu gamit ang P500 marked money nga adunay serial number JC326637.
Sa ilang pagkadakop, nakuha sa mga awtoridad ang mosunod; lima ka pakite sa gituohang shabu nga adunay kantidad nga P41,480; usa ka Oppo maroon Android phone nga adunay itom nga case; usa ka blue coin purse, National ID card, P120 nga cash nga personal nga kuwarta ug marked money.
Samtang dakpan sab ang 19-anyos nga lalaki nga wanted sa krimen nga robbery with homicide atol sa gilusad nga operasyon sa Sta. Ana Police Station sa Quezon Boulevard, Barangay 23-C, Davao City pasado alas 11 sa buntag niadtong Miyerkules, Hulyo 30, 2025.
Ang suspetsado giila nga si Roy Lan Gabriel Ampan, lumolupyo sa Purok Galingan, Barangay Mankilam, Tagum City, Davao del Norte, wala kini’y trabaho ug ulitawo.
Base sa warrant of arrest nga gipagula ni Presiding Judge Jimmy Bustilo Boco sa Family Court, Branch 2, sa Tagum City, si Ampan dunay kaso nga Robbery with Homicide ubos sa Criminal Case 33454-07-2025.
Ang maong warrant giisyu niadtong Hulyo 28, 2025 nga walay girekomendang piyansa.
Ang operasyon gipangulohan ni Police Lieutenant Jerex J. Cagurol, ubos sa direktang pagdumala ni Police Major Richeen M. Lagnayo, station commander sa PS1 Sta. Ana, uban sa mga sakop nga sila Police Senior Sergeant Eliseo Bustamante Jr., ug Police Master Sergeant Romel Demillo ug kauban usab ang mga personahe sa Tagum City Police Station.
Giseguro sa kapulisan nga nasayran sa suspetsado ang iyang katungod ug ang balaod nga iyang nalapas, subay sa Supreme Court Resolution A.M 21-06-08-SC. Gigamit usab ang Body-Worn Camera (BWC) atol sa operasyon.
Ang tulo ka mga suspek nakakustodiya na selda sa kapulisan aron nga atubangon ang ilang mga kaso ngadto sa hukmanan. (Jeepy P. Compio)