GIKONDENA sa grupo sa makaiyanhon nga nakabase sa Davao City ang di sakto nga pagtam-ok og mga basura sa kritikal nga watershed.
Ang Interfacing Development Interventions for Sustainability (Idis) Inc. sa ilang Facebook niadtong Huwebes, Enero 11, 2024, nagsulti nga ang pagtam-ok og mga basura sa Panigan-Tamugan Watershed di lang makadaut sa kinaiyahan apan lakip na sab sa tanang Dabawenyos.
Niadtong Enero 9, 2024, ang Apo Agua Infrastructura, Inc. uban sa Davao City Water District (DCWD) nagpahibawo atubangan sa Ika-20 nga Konseho nga ang Davao City Bulk Water Supply Project (DCBWSP) nagtrabaho na sukad Disyemre 1, 2024. Ang DCBWSP nagpunay og puga og tubig gikan sa Panigan-Tamugan River ug nagsuplay sila ngadto sa DCWD, ug ang DCWD nagsuplay og tubig ngadto sa mga kabalayan sa Davao.
Ang basura nga nakaplagan sa Idis ug daghang mga Bantay Bukid nagsubay lang sa Panigan River nga mao ang sanga ngadto sa Tamugan River kon diin ang pasilidad sa Apo Agua gipahimutang ug dinhi sila nagakuha og tubig alang sa bulk water project. Pinaagi sa pagbilin niining mga basura sa tubig nga nagdagayday sa mga kasapaan sa Tamugan ug Panigan makaapekto kaayo kini og dako.
Gidasig sa Idis ang Dabawenyos, ilabi na mga vloggers, bloggers, ug social media influencers nga likayan ang pag-adto sa daghang mga protected areas sa dakbayan sa tumong nga paglingaw-lingaw lang. Giawhag sab nila ang mga vloggers, bloggers, ug social media influencers di magpromotar og mga lugar sa siyudad nga wala magsusi sa mga balaod o mga ordinansa nga nagprotekta niini.
Giawhag sab nila ang City Environment and Natural Resources Office (Cenro) nga mohimo og kampanya sa pagpakatag og mga impormasyon ug pag-edukar nga nagpahimug-at sa bili sa saktong paglabay ug pagdumala sa basura ug ang pagpreserba sa kinaihayan.
Gawas niini, buot sa Idis nga mga opisyal sa Barangay Tawantawan ug Carmen magdugang sa ilang pagbantay ug paghatag og seguridad aron nga mapugngan ang dugang pagkadaut sa lugar.
Samtang si May Che Capili, tigpamaba sa Apo Agua nagsulti sab atol sa ISpeak Media Forum Huwebes sa buntag, Enero 11, 2024, sa City Mayor's Office, nga usa sa ilang pinakadako nga hagit nga ilang giatubang sa Watershed Management Council mao ang basura.
Niadtong Enero 3, 2024, nagpadayag og kabalaka ang Idis bahin sa pagdagsang sa mga Dabawenyo sa Panigan-Tamugan River sa Barangay Carmen. Ang Bantay Bukid sa lugar nagsulti nga bisan sa mga restriksiyon, daghang mga tawo nidayo gihapon sa suba ug magbilin sa nagkadaiyang mga basura sama sa plastik, botelya sa ilimnong makahubog, ug mga upos ug pakite sa sigarilyo.