WAY bagyo ang gilauman nga mamugna o mosulod sa Philippine Area of Responsibility (PAR) hangtud matapos ang Mayo, sumala sa weather bureau, bisan kung ang Mindanao padayon nga makasinati og mga kusog nga ulan tungod sa intertropical convergence zone (ITCZ).
Sa ilang katikaran sa 5 sa kaadlawon, Huwebes, Mayo 22, 2025, gitaho sa Philippine Atmospheric, Geophysical and Astronomical Services Administration (Pagasa) nga ang ITCZ nagpabiling aktibo sa tibuok Mindanao, nga nagdala og kasarangan ngadto sa kusog nga pag-ulan ug pagpanalugdog, ilabi na sa Davao Region.
Nagpahimangno si Pagasa weather specialist Benison Estareja sa mga molupyo sa mga naapektuhan nga lugar nga magpabilin nga alerto alang sa posibleng kalit nga pagbaha ug pagdahili sa yuta, ilabi na sa mga landslide-prone zones.
Sukad sa ikaduhang semana sa Mayo, sagunsong mga pag-ulan sa Davao Region niresulta sa mga pagdahili sa yuta ug pagkadaut sa imprastraktura, apil ang pagkaguba sa mga dalan sa Jose Abad Santos, Davao Occidental.
Gikan Huwebes hangtud Dominggo, ang halapad nga mga pag-ulan magpadayon sa dakong bahin sa Mindanao, Palawan, ug sa Visayas tungod sa padayong lihok sa ITCZ.
Ang ITCZ mao ang daut nga panahon nga namugna sa "convergence of trade winds from the northern and southern hemispheres", nga kasagaran mohatud og mga pagpanalugdog ug dugay nga mga pag-ulan.
Samtang ang easterlies, mao ang "warm winds" nga mohuyop gikan sa Pacific Ocean, kasamtangang nagdominar sa dagan sa panahon sa Luzon ug Visayas.
Kini nga mga hangin gilauman nga magdala og init ug fair weather, apan katag-katag nga mga pagpanalugdog magpabilin sa hapon o gabii.
Gikompirma ni Estareja nga way low-pressure areas ang namonitor, sulod o duol sa PAR, ug way bagyo ang nalantawan nga mamugna sa hinapos sa Mayo.
Bahin sa opisyal nga panahon sa ting-ulan, gikanayon sa ahensiya nga di pa kini lauman hangtud sa sayong bahin sa Hunyo o mas sayo pa. Esplikar ni Estareja nga ang pagdeklara sa pagsugod sa ting-ulan, mag-obserba ang Pagasa og sagunson nga lima ka adlaw nga pag-ulan nga magtriger pakasadpan, ilabi nga makaapekto sa kasadpang seksiyon sa Luzon ug Visayas.
“We are still under the influence of easterlies, so the conditions for the rainy season are not yet present,” Estareja said. “But we might see the onset in the first or second week of June, with the earliest likely in the first few days of the month.”
Bisan kung walay bagyo, nag-awhag gihapon ang PAGASA sa publiko nga magpabilin nga "informed and take precautionary measures", ilabi na sa mga lugar nga nakasinati og sagunson nga mga pag-ulan tungod sa ITCZ. (David Ezra Francisquete)