GITIN-AW sa Police Regional Office-Davao Region (PRO-Davao) nga way bisan usa sa ilang "high-ranking" nga mga opisyal ang nagpositibo sa illegal nga druga, sukwahi sa mga taho nga kanhi gipaambit sa usa ka vlogger, nga wala magdugay nakakuha og pagsaway sa social media, ilabi na Facebook.
Ang insidente gisundan og taho sayo niining semanaha sa usa ka usa ka istasyon sa radyo nga nakabase sa Davao City nga nagpakita og imahe ni PRO-Davao spokesperson Police Major Catherine Dela Rey.
Apan ang hulagway way mahisubay sa tibuok sulod sa artikulo.
Niadtong Abril 7, 2025, si PRO-Davao Regional Director Police Brigadier General Leon Victor Rosete nagkompirma nga si Dela Rey wa nalambigit sa bisan unsang ilegal nga aktibidad.
Iyang giklaro nga usa ka lalaking pulis nga gikan sa New Bataan, Davao de Oro, mao ang nagpositibo sa methamphetamine, usa ka "dangerous drug," atol sa random drug test nga gihimo isip kabahin sa internal cleansing program sa Philippine National Police.
“The office values transparency, which is why we are reporting the result of this drug test. The officer who tested positive will undergo the proper process and will be dealt with fairly by the authorized disciplinary board,” matud sa pahayag ni Rosete.
“This claim is completely false and misleading. PMAJ Dela Rey did not test positive and continues to serve as the official spokesperson of PRO-Davao in good standing. The spread of this fake information is being taken seriously and may lead to legal action,” subay sa pahayag. (David Ezra Francisquete)