Welder nasaghid sa kuryente, nikirig

Welder nasaghid sa kuryente, nikirig
BFP-Midsayap

NAGPAALIM na sulod sa balay tambalanan ang usa ka lalaki sa dihang nakuryentihan samtang nag-welding sa atop nga bahin sa buhatan sa Bureau of Fire Protection (BFP) sa Midsayap alas 4:30 sa hapon niadtong Sabado, Marso 2, 2024, sa probinsiya sa Cotabato.

Giila ang biktima nga si Ryan Caguimba, 30, minyo ug nagpuyo sa Barangay Kiwanan, Midsayap, Cotabato Province.

Nasayran gikan sa mga awtoridad nga nag-welding ang biktima sa atubangang bahin sa atop sa BFP-Midsayap sa dihang nasaghiran niini ang live wire sa Cotabato Electric Cooperative (Cotelco) nga nagserbisyo sa unom ka mga munisipalidad sa probinsiya nga mao ang Pigcawayan, Pikit, Aleosan, Libungan, Midsayap, ug Alamada (PPalma).

Gihulagway nga kalit nga nikirig ang biktima ug nalagpot sa iyang gilingkuran ug nisiyagit nga nangayo og tabang.

Gidali gilayon nga gitabang si Caguimba sa rescue unit sa BFP-Midsayap ug gidala ngadto sa balay tambalanan human makaangkon og grabeng paso sa kalawasan ang biktima.

Hinuon, giabaga sa BFP-Midsayap ang galastusan sa biktima sa balay tambalanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph