GIHANGOP sa kalikopanhong adbokeyt ang desisyon sa Supreme Court (SC) en banc sa pagpagawas og "Writ of Kalikasan" kabahin sa Samal Island-Davao City Connector (SIDC) Bridge.
Sa hiniusang pahayag sa Ateneo Public Interest and Legal Advocacy (Apila), Green Juris, Interfacing Development Interventions for Sustainability (Idis), ug Ecoteneo, matud nila nga ang pagpagawas sa "writ" nagdala og lig-ong sinyales nga way kalamboan nga labaw pa sa balaod ilabi kung naghulga kini sa kinaiyahan ug mga kinabuhi sa komunidad.
Matud nila nga mga nagpetisyon nabalaka og dako bahin sa di na mahulipan nga danyos nga mahimo sa SIDC ngadto sa marine ecosystem sa Paradise Reef sa Samal Island ug sa Hizon Marine Protected Area sa Davao City.
“We call on government agencies and private entities involved to respect the process and prioritize environmental integrity over profit or expediency. Infrastructure must never come at the cost of environmental destruction and the disenfranchisement of communities,” pagtuaw nila sa ilang pahayag Hulyo 1, 2025.
Unya gidayeg sa grupo ang nagpetisyon ug ang mga molupyo alang sa padayong pagbarog sa kalibutan, umaabot nga henerasyon, ug kalamboan nga modelo sa kaangayan, inklusibo, ug malutayon.
Gikanayon sab sa grupo nga ang pagduso sa Korte Suprema sa mga nagpetisyon alang sa Temporary Environmental Protection (Tepo) ngadto sa Court of Appeals sa Cagayan de Oro naghatag og sinyales sa dinalian ug seryusong butgang.
Sa samang adlaw, nag-isyu sab ang SC og Writ of Kalikasan batok sa Department of Public Works and Highways (DPWH), Department of Environment and Natural Resources (DENR), Samal Island Protected Landscape and Seascape Protected Area Management Board, ug sa China Road and Bridge Corporation.
Gipangayoan sa SC ang mga respondente og verified Return of the petition sulod sa non-extendible period nga napulo ka adlaw human naserbi ang "writ."
Kahinumdoman, Abril 21, 2025, mga molupyo, grupo nga makainayahon, ug mga organisasyon sa komunidad nisang-at og Writ of Kalikasan sa Korte Suprema nga nagtinguha nga ihunong ang pagkonstrak sa tulay nga gialegar nga hulga sa duha ka nag-unang coral ecosystems: Paradise Reef sa Samal ug Hizon Marine Protected Area sa Davao City.
Mga nagpetisyon nagtin-aw nga gisuportahan nila ang bridge project apan nanawagan alang sa pagpahaum aron nga maprotektahan ang marine biodiversity.
Ang Writ of Kalikasan maoy remedyo nga mahimo ngadto sa "natural or judicial person or any entitle authorized by law, people’s organization on behalf of persons whose constitutional right to a balanced and healthful ecology is violated, or threatened with violation by an unlawful act."
Sayo niini, gitaho sa DPWH nga ang SIDC naa na sa 38 porsiyento nga komplesyon sukad Hunyo 27, 2025. Ang construction project mas nilabaw na sa target completion rate nga 16 porsiyento, nagmarka og positive slippage nga 22 porsiyento.
Ang SIDC project gigastohan pinaagi sa Official Development Assistance (ODA) gikan sa People’s Republic of China ug gipatuman sa DPWH Unified Project Management Office–Bridges Management Cluster (UPMO-BMC), uban ang China Road and Bridge Corporation isip contractor.
Kung matapos, ang SIDC himuong "toll-free, four-lane extradosed bridge stretching 4.76 kilometers" gikan sa R. Castillo–Daang Maharlika sa Davao City padulong sa Samal Circumferential Road.
Gilauman nga ang tulay makapakubos og oras sa biyahe gikan sa Davao City ngadto sa Samal Island, mapalambo ang "regional mobility, promote tourism, and drive economic growth" sa tibuok Davao Region. (Rojean Grace G. Patumbon)