GIPAMAHAYAG sa Davao Light and Power Company (Davao Light) nga dunay gamay nga impak sa balayranan sa kuryente human ang "yellow alert status" sa Mindanao, nga gipahibalo sa National Grid Corporation of the Philippines (NGCP).
Gikanayon ni Fermin Edillon, pangulo sa Reputation Enhancement Department sa Davao Light, nga wala pa hinuon siya'y opisyal nga power rates alang sa bulan sa Agosto. Apan ang kasamtangang balayranan sa kuryente alang sa Hulyo naa sa P8.70 matag kilowatt-hour, nga usa sa pinakaubos nga balayranan sa Davao Region.
Dugang pasabot ni Edillon nga ang balayranan sa kuryente alang sa Agosto gilauman nga mapagawas sa mosunod nga adlaw ug i-post sa ilang opisyal nga Facebook page.
“Since naay yellow alert, naa yata duha ka planta nga nag shut down so mao to affected atoang power supply in Mindanao so it also affects atoang supply here sa Davao,” pag-esplikar niya atol sa Habi at Cape niadtong Miyerkules, Agosto 13, 2025, sa Ayala Malls Abreeza.
Sayo niini, niabiso ang NGCP nga niadtong Agosto 1, 2025, nga ang Visayas ug Mindanao grids ipahimutang ubos sa yellow alert tungod sa pagtaas sa ihap sa power plant outages.
Ang yellow alert nagpasabot nga samtang ang available electricity supply igo pa gihapon nga makatubag sa demand, ang mga power outages mahitbo kung dugang pa planta sa kuryente makasinati og aberiya.
Esplikar sa NGCP nga ang reserbang kuryente mas minipis tungod sa significant number sa planta nga nipailawom sa wala maplano o pugos og kapawong, uban ang niubos nga kapasidad sa "generation".
Apan ang maong kahimtang gilibkas na alas 7:46 sa gabii niadtong Agosto 1, 2025.
Subay sa Power Situation Outlook alang sa Agosto 13, 2025, ang Mindanao dunay available generating capacity nga 3,382 megawatts (MW), usa ka system peak demand sa 2,487 MW, ug operating margin nga 895 MW.
Gitaho sab sa NGCP nga sukad Agosto 11, 2025, ang Mindanao dunay kinatibuk-an nga transmission capacity nga 4,697 MW, uban ang 3,291 MW nga existing dependable power plant capacity, ug 1,406 MW nga available transmission capacity. (Rojean Grace G. Patumbon)