TINGKAGOL sa prisohan ang barangay kapitan human gidakop sa mga pulis alas 11:00 sa buntag, Huwebes, Oktubre 17, 2024, sa Lambayong, probinsiya sa Sultan Kudarat.
Giila ang kapitan nga si Norodin Sindatukan Utto Jr., 35-anyos, minyo, nga taga Barangay Panadtaban, Rajah Buayan, Maguindanao del Sur.
Sumala kang Lambayong Chief of Police, Captain Jayson Cepeda, nga nasiplatan nila ang suspek nga mibisita sa iyang paryente sa Purok Rang-ay, Barangay Poblacion, Lambayong, Sultan Kudarat.
Abtik nga milihok ang mga pulis sa Lambayong Municipal Police Station ug gidakop dayon si Utto base sa warrant of arrest nga giisyu sa korte.
Dunay kaso ang suspek nga kalapasan sa Republic Act 10591 o Comprehensive Law on Firearms and Ammunition.
Dugay na nga gipangita si Kapitan Utto sa mga pulis sa dihang nagpagawas ang korte og warrant of arrest batok kaniya niadtong Oktubre 3.
Balhog na ang suspek sa prisohan sa kapulisan sa Lambayong MPS. (Edgar E. Fuerzas)
